La Spitex Foppa porscha ses servetschs da tgira a domicil en sis vischnancas. Numnadamain a Glion, Lumnezia, Sursaissa/Mundaun, Stussavgia, Val s. Pieder e Breil. Perquai han las vischnancas e la Spitex ina cunvegna da prestaziun. La vischnanca da Glion ha visà la cunvegna vertenta l'onn passà. Dapi l'emna passada è ina nova cunvegna puspè sin maisa, il parlament communal da Glion ha approvà quella. Suenter la decisiun da Glion han tschellas tschintg vischnancas purtadras da decider sch'ellas vulan surpigliar la nova cunvegna u betg. Quella è pli explicita cura ch'i va per ils duairs ed il controlling da la Spitex Foppa. Tschellas vischnancas èn cuntentas che la situaziun saja ussa schliada – uschia era il president communal da Sursaissa Mundaun, Ernst Sax.
Sper la cunvegna da prestaziun vuleva Glion era midar la clav da repartiziun dals custs restants tranter las vischnancas. Cura che la Spitex Foppa scriva cifras cotschnas, tge ch'è stà ils davos onns il cas, ston las vischnancas surpigliar il deficit. Tenor il president communal da Glion Marcus Beer pajava la vischnanca da Glion enfin ussa memia bler, quai vesì tenor il principi dal chaschunader.
Là datti ina malgistadad nunditga, ma i n'è betg mo per nus ina malgistadad.
Ils blers presidents da tschellas vischnancas n'han betg vulì prender posiziun tar las pretensiuns da Marcus Beer. Els na veglian betg bittar benzin en il fieu, ussa che la situaziun saja sa calmada.
Ernst Sax ch'è era president da la Conferenza dals presidents da la Surselva manegia, che per tut las fatschentas entaifer la Regiun Surselva vegnia duvrà ina clav a repartiziun sumeglianta. Tar la Spitex s'orienteschia quella tenor la populaziun, la situaziun finanziala da la vischnanca ed era ils custs effectivs per las uras da tgira ch'èn vegnidas prestadas en la vischnanca.
Tar clavs da repartiziun dals custs chattan ins adina meglras schliaziuns sch'ins mira mo per sasez.
Quella clav da repartiziun dals custs restants n'è la vischnanca da Glion betg vegnida da midar. In dals arguments da Marcus Beer da visar la cunvegna da prestaziun avant in onn era tranter auter, che la vischnanca da Glion stoppia pajar memia bler tenor la clav da repartiziun. Quella situaziun è ussa dentant sa midada, uschia che la vischnanca da Glion n'ha betg pli in tal squitsch da midar la situaziun – perquai ch'ella profitescha uss dal sistem da solidaritad actual.
