La visada da la cunvegna da prestaziun haja chaschunà malsegirtad tar il persunal, di Franco Hübner, il president da la Spitex Foppa. Era las midadas al timun hajan chaschunà inqual demissiun. En mintga cas è la situaziun da persunal sa pegiurada nettamain en il davos onn. La dimensiun saja uschia che sche duas enfin trais ulteriuras persunas diplomadas giajan davent, dettia ina gronda rusna. Ussa saja impurtant d'anc ina giada dar in sguard critic sin l'atgna organisaziun per pudair optimar la structura ed ils process, manegia Franco Hübner.
Nus avain da tgirar tanta glieud sco nus pudain, ma nus stuain er proteger noss persunal.
Cun il persunal disponibel po la Spitex Foppa tgirar ina tscherta quantitad da persunas. Per proteger il persunal stoppian ins en l'avegnir guardar exact sin las annunzias e sch'i na saja propi betg pussaivel, refusar nova clientella u mo proponer prestaziuns parzialas, uschia Franco Hübner.
Nova cunvegna è sin maisa
L'onn passà ha la vischnanca da Glion visà il contract da prestaziun cun la Spitex Foppa sin la fin da l'onn 2024. Per Glion hai sinaquai dà duas pussaivladads co vinavant cun la tgira a domicil: u che la vischnanca tschertga ina nova purschidra per quests servetschs, u che la vischnanca e la Spitex Foppa fan ina nova cunvegna – quai ch'ellas han ussa fatg. Suenter pliras sesidas tranter tut las vischnancas che dovran ils servetschs da la Spitex Foppa, hai dà ina nova cunvegna. Quella definescha pli exact, co che la Spitex Foppa ha d'infurmar e dar pled e fatg a las vischnancas.
I n'è betg enormamain insatge auter, ma i dat ina nova structura ed igl è vegnì definì pli cler, quai ch'è segir in pli grond avantatg.
Sin la pretensiun da la vischnanca da Glion da midar la clav da repartiziun davart ils custs restants en sia favur, èn las ulteriuras vischnancas betg entradas.
La suprastanza communala da Glion ha gia approvà la nova cunvegna. Suenter ch'il parlament da Glion vegn a decider en chaussa, han las ulteriuras vischnancas anc da purtar la nova cunvegna en ils gremis politics da decisiun.
