A chaschun da la sesida dals 30 da settember 2015 aveva il parlament communal da Glion approvà ina cunvegna da prestaziun cun la Spitex Foppa. Avant in onn ha la suprastanza communala da Glion visà il contract surprendentamain. La raschun principala era la malcuntentientscha envers la gestiun da la Spitex. Ussa ha il parlament approva ina nova versiun da la cunvegna da prestaziun. Quella e formulada pli precis che la veglia e duai impedir ch'ils custs san crescher memia fitg.
Agir dispitaivel
Il president da la cumissiun dal quint e gestiun dal parlament, Claudio Quinter, ha crititgà durant la sesida dal parlament che l'agir da la suprastanza saja stada senza sentiment per la situaziun ed haja procura per malsegirtad tar il persunal e tar la populaziun.
En l'avegnir stoppia la suprastanza ponderar meglier lur agir. La nova cunvegna è stada nundispitaivla en il parlament ed è vegni approvà unanimamain. Da nov na vala la cunvegna betg a temp nundefinì cun in temps da visada dad in onn sin mintga fin da l'onn, mabain sulet per dus onns e sto alura vegnida contrahada da nov. La cunvegna vala actualmain be per la vischnanca da Glion. Sche las ulteriuras vischnancas purtadras da la Spitex Foppa – Lumnezia, Sursaissa, Stussavgia e Breil – vulan surpigliar la nova cunvegna, ston quellas decider en atgna reschia. Sche betg, lura resta la cunvegna actuala en vigur.
Nova halla da gimnastica per il Center da formaziun Surselva
Il Center da furmaziun Surselva survegn ina nova halla da gimnastica sin il terren da la vischnanca da Glion. Il parlament communal ha approvà il dretg da construcziun a la Regiun Surselva, la purtadra dal center da furmaziun. Suenter lunga discussiun ha il parlament decidì cun 21 cunter 4 vuschs da conceder il dretg da bajegiar senza enconuscher la schliaziun finala. Quella vegn uss elavurada ensemen cun la Regiun Surselva.
Duas pussibilitads
L'onn 2019 ha la Regiun Surselva decidì da midar il domicil dal center da furmaziun Surselva. Enstagl en la claustra da las soras dominicanas sur la citad da Glion duain las emprendistas ed ils emprendists ir a scola en il nov bajetg planisà gist sper las rodaglias da la Viafier retica a la staziun.
Per l'instrucziun da sport ed ina halla da gimnastica manchia il plaz en quai lieu. Perquai ha la regiun Surselva tschentà la dumonda a la vischnanca da Glion da bajegiar ina nova halla sin terren da la vischnanca.
En dumonda vegn ubain ina halla provisorica che la Regiun Surselva avess da finanziar sez, u ina nova halla da gimnastica che vegniss integrada en il concept da immobiglias da las trais hallas existentas sin l'areal da scola a Glion. En quai cas stuess la vischnanca er sa participar vi da la finanziaziun.
