La Spitex Foppa ha, sco la lescha chantunala preveda, ina cunvegna da prestaziun cun las vischnancas dalla Foppa. Quai munta ch'ella lavura per las vischnancas Lumnezia, Sursaissa Mundaun, Stussavgia, Val Sogn Pieder, Breil sco era Glion. Ma la vischnanca da Glion ha uss visà quella cunvegna sin fin da l'onn 2024. Marcus Beer, il president vischnanca da Glion, argumentescha envers RTR quest pass cun ils custs che creschian ad in crescher. En pli na sajan ils responsabels betg avunda transparents cura ch'i giaja per decisiuns impurtantas.
Il president da la Spitex Foppa, Franco Hübner, ha confermà la visada da la cunvegna da la vischnanca da Glion. El accentuescha che l'onn passà saja stà ina sfida pertutgant las finanzas. Las renfatschas da Marcus Beer na lascha el dentant betg valair. Ins haja infurmà en detagl davart la situaziun durant la radunanza dals commembers da la primavaira e las delegadas ed ils delegads da las vischnancas hajan approvà il quint annual da l'onn 2022.
Elavurar ina nova cunvegna da prestaziun
I saja uss da chattar ina schliaziun communabla, din omaduas partidas. Cunquai che Glion ha visà la cunvegna vertenta stoppian ins far ina sesida cun tut ils presidents communals da las vischnancas pertutgadas. Quai saja planisà fin settember ni entschatta october, uschia Franco Hübner. Per il futur datti duas pussaivladads: U ch'ins vegnia da contractar ina nova cunvegna da prestaziun communabla, ubain la vischnanca da Glion tschertga ina nova purschidra per quellas lavurs.
