Pliras funtaunas independentas han ditg envers RTR che la reorganisaziun da la tgira en il Spital regiunal Surselva haja procurà per bleras demissiuns, fin 14 persunas dapi la fin settember. Il manader da la tgira ch’era responsabel per la reorganisaziun haja l'october lura demissiunà per immediat. Tenor pliras funtaunas saja la malcuntentientscha en la tgira gronda e la communicaziun envers il persunal da la tgira stada schletta.
Reorganisaziun procura per numerusas demissiuns
Thomas Buchli, il president dal cussegl administrativ dal Spital regiunal Surselva, conferma ch’il manader da la tgira ha demissiunà per immediat e ch’il post dal manader da tgira saja vacant. La demissiun haja in connex cun la reorganisaziun da la tgira che haja cumenzà l’onn passà. Fadri Bisatz, il mainagestiun da l’ospital ha surprendì il timun da la tgira ad interim.
Tenor Thomas Buchli han 9 persunas da la tgira demissiunà dapi il settember, pia dapi l’entschatta da la reorganisaziun. Quella cifra da visadas saja cleramain pli auta che normala, admetta el. En las partiziuns da la tgira dettia en general gia bleras midadas, ma l'ospital haja gì bleras demissiuns. E quai haja da far cun quai che l'ospital haja mess ensemen la partiziun da la chirurgia e quella da la medischina ad ina partiziun interdisciplinara. Quai crititgeschan pliras funtaunas e èn da l'avis che la qualitad da la tgira patescha uschia. Ord vista da l’ospital saja la qualitad da la tgira dentant fitg buna, tge che la certificaziun haja puspè mussà, uschia Thomas Buchli.
Squitsch da spargnar e mancanza da communicaziun
La raschun principala pertge che l’ospital ha mess ensemen pliras partiziuns ad ina partiziun interdisciplinara haja cleramain da far cun il squitsch da spargnar, uschia Thomas Buchli. L’ospital scriva sco tschels ospitals regiunals en il Grischun cifras cotschnas. L’ospital stoppia uschia spargnar tar il persunal e tegnair bass il deficit. Cunquai che l'instituziun ha durant l’enviern dapli lavur sto ella dentant er engaschar persunal temporar. Els haja uss avert in’auzada pervia da la gronda dumonda. Quai haja dentant da far nagut cun la reorganisaziun.
Ma fissi betg stà pussaivel da reorganisar la tgira senza tantas demissiuns? Tenor anteriuras persunas da la tgira na saja surtut la communicaziun betg stada buna. I sa tschentia adina la dumonda co ch'ins communitgescha ina tala midada e co ch’ins possia purtar cun la glieud, manegia Thomas Buchli. Da tschella vart fetschia il sistem squitsch, l’ospital stoppia spargnar ed el stoppia era realisar las mesiras. Pervia dal squitsch da temp possia esser che betg adina ils megliers meds vegnian tschernids. Tge che Thomas Buchli deplorescha è che l’ospital vegnia adina pli pauc flexibel sch'i va per giavischs individuals, cunquai ch’el ha adina pli pauc persunal.
El accentuescha che la reorganisaziun e las bleras demissiuns na sajan betg in stadi permanent. I saja ina situaziun extraordinaria en il mument. E cun quella stoppian ins uss viver.