Co vegnan ils ospitals regiunals grischuns puspè en pe ed or da las cifras cotschnas e sperditas enavos sin la via da success? Per chattar ora quai, ha il chantun incumbensà l'interpresa da revisiun KPMG d'elavurar fatgs correspundents per mauns da la politica. Quai en vista a la situaziun ch'il chantun sto metter en pe ina nova planisaziun d'ospitals en il sectur da la tgira acuta staziunara a partir dal 2026. Ussa ha il departament chantunal da giustia, segirezza e sanadad preschentà ils resultats da quest'analisa.
Reducir purschidas reduciss era entradas
L'interpresa da revisiun KPMG ha rimnà ils fatgs per incumbensa dal chantun, e propona d'examinar las structuras economicas dals ospitals. Tenor ils experts n'è betg la purschida da prestaziuns la raschun centrala per las cifras cotschnas u las sperditas dals ospitals regiunals. Ina reducziun generala da la purschida da prestaziuns en ils ospitals regiunals, sco per exempel tar la chirurgia staziunara u tar l'assistenza al part, n'avess betg dapertut effects positivs sin ils custs da gestiun, argumenteschan ils experts.
L'analisa mussa a moda clera, quant diversas che las sfidas dals purtaders èn en las differentas regiuns da provediment da sanadad.
Vegnissan stritgadas las prestaziuns da la chirurgia staziunara u da l'assistenza al part, lura avess quai bain consequenzas positivas tar ils custs - il medem temp però era consequenzas negativas tar las entradas. Mo tar dus dals tschintg ospitals, ch'ils experts han prendì sut la marella, avess ina reducziun da las purschidas in'influenza positiva, tar dus auters ina negativa e tar in ospital n'avess ina reducziun da las prestaziuns strusch in'influenza.
Ils ospitals duain plitost reexaminar lur structuras
Ils experts proponan perquai als ospitals e lur purtaders d'examinar a moda detagliada auters champs per optimar lur manaschis – en emprima lingia las structuras economicas. E lura la finala dad adattar lur purschida da prestaziuns al conturn ed al martgà. Tge adattaziuns ch'ils ospitals fan, e schebain insumma, ston ils singuls purtaders decider.
Pols politics vulan dapli autonomia per ils ospitals
Era tar politichers e politicras grischunas èsi cler ch'igl è dad agir. Ch'il chantun grischun ha da gidar a finanziar n'è betg dispitaivel. Walter Grass da la Partida populara e Beatrice Baselgia da la Partida socialdemocratica pretendan era dapli libertad per ils ospitals, da sez pudair influenzar la purschida – pia la pussaivladad da stritgar autonomamain tschertas purschidas. Per Nora Saraz Cazin da la Partida verdliberala, Maurizio Michael da la Partida liberaldemocratica e Kevin Brunold da l'Allianza dal center èsi era d'analisar la purschida, decider tge ch'ins veglia porscher e lura era procurar per las finanzas.