Sche las vischnancas n'augmentian betg lur contribuziuns per l'Ospital regiunal Surselva stoppian ins a partir da l'auter onn quintar cun massivs problems da liquiditad. En il mender cas giess l'ospital il 2026 concurs, uschia l'ospital en in messadi a las vischnancas purtadras.
La vischnanca da Glion ha gia garantì sia cumpart ch'ella vegn a pajar a l'ospital. La summa da 1,2 milliuns francs vegnia a procurar per in deficit en il quint annual da la vischnanca, tge ch'ins stoppia uss budgetar uschia, di Marcus Beer, il president communal da Glion. La suprastanza sco er il parlament han accordà questa summa unanimamain e senza discussiun.
Er il president communal da Trun, Dumeni Tomaschett, manegia che l'ospital regiunal saja fitg impurtant per la Surselva, surtut per ils lieus periferics. Ins n'haja ils davos onns betg scrit cifras cotschnas, uschia che la contribuziun d'in mez milliun francs per Trun saja da relativar.
Laax dumonda explicaziuns
In pau auter vesa quai la suprastanza communala da Laax. Bain che l'Ospital regiunal Surselva na vegnia betg mess en dumonda, veglia ella in pèr respostas da l'ospital avant da decider sur da l'augment da la contribuziun. Franz Gschwend vul savair tge che po en l'avegnir vegnir fatg a Glion, tge ch'ins stoppia midar e reorganisar, sco er tge ch'ins vul effectivamain er far.
L'Ospital regiunal Surselva ha per gronda part il sustegn da las vischnancas, ma da tuttas na survegn ella betg la contribuziun pli auta senza discussiun. Ch'i dovria l'ospital n'è betg dispitaivel, ma co quel duai en il futur vegnir finanzià e tge ch'el duai èn l'avegnir porscher, pudess anc procurar per inqual discrepanza.
La societad d'aczias stuess star sin atgnas chommas
L'Ospital regiunal Surselva è ina societad d'aczias che duess porscher in provediment medicinal da basa en la regiun. Sche quella societad vuless en l'avegnir renovar sia infrastructura, stuess ella en principi far in gudogn. Ma senza gudogn è la societad dependenta d'agid da las vischnancas.
L'Ospital chantunal n'ha betg bajegià per prender si tut ils pazients da las regiuns.
Che la dumonda per pli autas contribuziuns per l'ospital procura per dumondas tar tschertas vischnancas, chapescha il president dal cussegl administrativ da la «Spital regiunal Surselva SA», Thomas Buchli, ma ins stoppia insacura er discurrer da las prestaziuns che l'ospital duai porscher en l'avegnir.
Il mument evaluescha l'ospital intern co ch'el possia daventar pli effizient senza perder qualitad. Quai giaja tar in ospital spert sin donn e gust dal persunal. E la lutga per persunal qualifitgà saja il mument enorma, uschia di Thomas Buchli.
