Nus avain udì, Patrick Schaniel sa retira per immediat, ina demissiun surprendenta. Tge è propi capità?
Ch'i dat in clima da disfidanza en la suprastanza da la Sanasurselva, gliez n'è nagut nov. Mesemna avantmezdi hai dentant para dà in plum e Patrick Schaniel ha tratg las consequenzas ed è sa retratg per immediat. Ins ha sentì che la decisiun d'abditgar sco president n'è betg stada ina simpla ed en il discurs cun RTR ha el era menziunà ch'il di avess duì esser in di da kick-off, pia in di d'entschatta. Ma suenter las dispitas persunalas haja el tratg las consequenzas e bandunà la radunanza.
E sin dumonda da RTR ha er il vicepresident da la Sanasurselva, Dumeni Tomaschet, ditg avant curt che la probabilitad saja gronda ch'el sa retiria era. La suprastanza da la Sanasurselva sa cumpona da tschintg persunas – tschintg presidents communals da Mustér, Sumvitg, Trun, Glion e Schluein. Tranter quels datti para in grond foss?
Il foss tranter ils dus presidents da Schluein e Glion e quels da las trais vischnancas da la Cadi è propi grond. Cunzunt la relaziun cun il president da Schluein, Ralph Schläpfer, para d'esser pli che mo disturbada. Che las vischnancas da Schluein e Glion han crititgà surtut la structura ed er il cussegl d'administraziun da l'ospital regiunal Surselva – ed era l'agir da la Sanasurselva – n'è betg in misteri. Che quai explodeschia a tala moda è dentant ina surpraisa.
E forsa anc per agiuntar, la vischnanca da Schluein na sa participescha betg a la rait da sanadad, pia a la structura che vegn creada uss per metter las chasas da tgira, las organisaziuns da la Spitex e l'ospital regiunal sut in tetg. E la critica che l'ospital stoppia l'emprim far ses agens pensums è cleramain vegnida da las vischnancas giudim la Surselva – e surtut era da Ralph Schläpfer, il president communal da Schluein.
En l'intervista avain nus udì da Patrick Schaniel ch'i brischia en il sectur da sanadad en Surselva. Nua brischi propi?
Ins po dir che la tematica dal provediment da sanadad brischa en general. Las finanzas da l'ospital regiunal Surselva èn il mument propi in grond tema, e suenter l'evaluaziun vegn quai er a dar midadas en l'ospital a Glion, p. ex. tar purschidas che na rendan betg pli. E là èn las vischnancas da la Surselva dumandadas da decider tge provediment da sanadad ch'ellas vulan en l'ospital a Glion – quai munta era da surpigliar ils custs da quellas purschidas. Sche la suprastanza n'è betg perina da surpigliar quels deficits, alura vegni grev da persvader las vischnancas da purtar quests custs er en l'avegnir.
Da princip èsi ina dumonda da custs e da tgi che porta quels. Ins vesa er il medem cas a Savognin. Là ha uss la vischnanca da Surses da surpigliar la finanziaziun da l'ospital u dal center da sanadad. La dumonda è a la fin sche las vischnancas sursilvanas vulan l'ospital regiunal Surselva u betg.
Gionduri Maissen
Redactur Surselva
