La situaziun da persunal en il sectur da sanadad è qua omnipreschenta. Uschia na pon bleras chasas da tgira en la Surselva betg occupar tut lur letgs pervi da memia pauc persunal. Savens sa tschentan da quels cas la finala tar las organisaziuns da la Spitex. Els sentian in squitsch da prender si pazientas e pazients, ma els emprovian adina da chattar ina soluziun e fin uss saja quai era gartegià. Quai di Rainer Krättli, mainafatschenta da la Spitex Foppa.
Impurtant saja che la qualitad da la tgira constettia. Perquai dovria blera flexibilitad da tuts. Ma els stoppian propi far ina tscherta selecziun perquai ch’els hajan l’ultim temp ina gronda mancanza – surtut da persunas scoladas, di Krättli. Las cunvegnas da prestaziun cun las vischnancas obligheschian els da chattar soluziuns e quai muntia era gronda lavur da planisaziun, di l’um che maina l’organisaziun dapi radund in mez onn.
Sanasurselva n’ha era betg la soluziun
Ina da las responsablas per il provediment da sanadad en Surselva è l’organisaziun Sanasurselva. A quella fa la gronda part da las vischnancas en Surselva part. Els enconuschian la problematica da persunal, ma er els n’hajan betg la soluziun, di la presidenta Martina Beeli. Per ella èsi er impurtant che l’entira societad surpiglia dapli responsabladad per lur confamigliaras e confamigliars, ma er che las organisaziuns pon surpigliar lur responsabladad.
Rait da sanadad vul purtar meglierament
In meglierament duai la Rait da sanadad Surselva purtar, di Martina Beeli. Els hajan gia fundà quella ed ils proxims onns vegnian ins a posiziunar quella ed era definir las incumbensas e responsabladads. In dals puncts centrals è il pool da persunal. Cun quel veglian ins surtut evitar che las instituziuns da sanadad existentas en Surselva concurrenzeschian ina a l’autra.
Quai vegn a dar in contract per tuts ed uschia era dapli pussaivladads per persunas scoladas, di Martina Beeli. Ins stoppia era vesair la situaziun sco schanza, pertge uss stoppian ins ponderar sche las structuras existentas fan senn – e sche na, alura era agir concret. Quai possian ins far meglier sche tut saja sut in tetg, accentuescha la presidenta ch'ha remess ses post sin la proxima radunanza.
Adattà al tema
La lavur da la spitex e la tgira èn adina puspè tema en noss formats da film – e procura per discussiuns en il «Controvers».
