La punt pendenta che collia Mustér cun Mumpé Medel è vegnida inaugurada ils 16 da november. Las lavurs da construcziun n’han betg chaschunà problems, uschia che la pli lunga punt pendenta dal Grischun ha pudì vegnir realisada entaifer paucs mais. La gronda sfida è plitost stada la finanziaziun da la punt, ha ditg il president da l’uniun purtadra Christian Loretz. Era quella è la finala vegnida ensemen ed il «Padrinadi svizzer per vischnancas da muntogna» ha garantì a l’uniun da surpigliar il rest da la finanziaziun. Uschia ha l’uniun «la Pendenta» pudì surdar ina punt finanziada dal tut a la vischnanca da Mustér – in regal da radund dus milliuns francs.
A tgi appartegn la punt?
Quai è stada ina da las dumondas ch’han fatschentà la populaziun da Mustér. La raschun è ch’il suveran ha gì refusà in credit da radund 400’000 francs per la punt pendenta. Perquai eri da sclerir tgi ch'ha da mantegnair la punt ed a tgi ch’ella appartegn. Las iniziantas dal referendum cunter la finanziaziun da la punt han fatg valair che la votaziun haja era sclaus ina participaziun da la vischnanca en connex cun il mantegniment. Quai ha la suprastanza communala da Mustér relativà ed argumentà che sulet la vischnanca possia vegnir possessura da la punt ed era mantegnair quella en l’avegnir. Tut saja stà correct e sclerì cun ils giurists, ha il president communal René Epp gì argumentà. La finala è la punt cun l'inauguraziun ida vi en il possess da la vischnanca. Cunquai ha ella era l’obligaziun da mantegnair la punt pendenta en il futur.
Test da paisa extraordinari
In punct culminant avant l’avertura uffiziala da la punt èn stads ils test da paisa sin la punt. Cunquai che las lavurs da construcziun èn stadas finidas pli baud che quintà ha l’uniun dumandà ils pumpiers da Sursassiala d’organisar in test da paisa per la punt. Uschia èn vegnidas montadas pliras chistas emplenidas cun aua per mirar sche la punt po tegnair ina paisa da 20 tonnas. Ils test èn stads in success. Las examinaziuns vegnan ussa publitgadas e pon vegnir duvradas per la construcziun d’ulteriuras punts pendentas. Sco Christian Loretz ha ditg, saja in tal test anc mai vegnì fatgs en Svizra. Els hajan cun quai test pia era pudì contribuir datas scientificas per l’entira branscha da construcziun e quai muntia in'ulteriura plivalur.