Las lavurs per realisar la pli lunga punt pendenta dal Grischun han cumenzà a Mustér. Per ils responsabels è quai in di legraivel, surtut suenter la votaziun a l’urna nua che la populaziun da Mustér aveva refusà da dar daners communals per la realisaziun. Quai accentuescha il president da l’uniun, Christian Loretz envers RTR. La trumpada da la votaziun è dentant daditg surmuntada, surtut era perquai che las pendicularas cun lur investider Marcus Weber han contribuì la summa da radund 300’000 francs per quest project. Perquai speria el fitg che la punt futura na collia betg sulet il vitg da Mustér cun la fracziun da Mumpé Medel, mabain era il foss ch’igl ha dà tranter adversaris e promoturs da quella punt, di Christian Loretz.
Finanziaziun quasi sut tetg
Ditg è la finanziaziun da quest project, che custa radund dus milliuns francs e che vegn ord iniziativa privata e finanzià per gronda part cun daners privats, stada ina gronda sfida. Il mument manchian anc radund 8% dals daners necessaris, di Christian Loretz. Ma els da la suprastanza sajan persvas da vegnir anc da ramassar questa stad ils daners che mancan cun agid da sponsurs e donaturs. Quai vegnan els a far parallel cun la realisaziun dal project.
Ina punt cun pliras novaziuns
Per l’ina vegn la punt d’ina lunghezza da 270 meters ad esser la pli lunga punt pendenta existenta en il chantun Grischun. Ma era l’emprima punt pendenta sur il Rain insumma, di Christian Loretz. Per l’auter vegnan ins cun las raits da segirtad necessarias era a dar a la punt dapli stabilitad, quai che saja medemamain ina novaziun per talas punts, accentuescha Loretz ch’è da professiun inschigner da construcziun. Uss vegnian fatgas las lavurs per ils fundaments da betun, quai saja ina lavur difficila. Surtut vi da la vart da Mumpé Medel èn las spundas fitg stippas, e perquai vala quai da lavurar fitg precaut. Tuttina vegnian ins a pudair far ina via provisorica, per vegnir al plazzal cun maschinas pli grondas per pudair realisar tut las lavurs da fundament, di Christian Loretz.
L’atun vegnan tratgas las sugas
A partir da la fin d’avust vegnan alura tratgas las emprimas sugas sur la val, ed entaifer quasi dus mais è alura la punt finida. Sche nagut na vegn tranteren, èsi previs da pudair traversar la val sin ina autezza da 95 meters per l’emprima giada il november.
