Il cumenzament da mars entschaivan las lavurs vi dals fundaments per la punt pendenta sur il Rain a Mustér. Quai ha confermà envers la FMR il president da l'Uniun punt pendenta Christian Loretz. Las lavurs cuzzian fin l'atun, e sche tut giaja sco planisà saja la punt accessibla il november 2024, di Loretz.
Sco emprim vegnan ussa allontanadas las plantas al lieu da la punt. En il decurs da la primavaira e la stad vegnan installadas las ancras per tegnair e purtar la punt. A partir da l'avust vegn lura montada la construcziun da la punt, en spezial las sugas.
Premissas ademplidas
L'Uniun punt pendenta aveva decis l'avrigl 2023 da bajegiar la punt uschespert che 90% dals custs sajan cuvrids e la lubientscha da bajegiar saja sin maisa. Questas premissas èn ussa ademplidas, uschia che la suprastanza da l'uniun ha decis la fin da schaner da surdar las lavurs. Actualmain vegn lavurà vi dals detagls dal project e vi da la statica.
La punt pendenta da Sontga Gada a Mumpé Medel vegn ad esser 270 meters lunga ed avair ina autezza maximala da 100 meters. Ella custa 1,8 milliuns francs. Da quels 1,8 milliuns francs mancan actualmain anc 200'000 francs, sco quai che l'uniun scriva. Dapi il settember passà saja però reussì da recaltgar ulteriurs daners. Differents sponsurs sco era las vischnancas da Tujetsch e Medel hajan sincerà in sustegn finanzial. 25'000 francs ha l'uniun survegnì da la Banca Raiffeisen Cadi. Il chantun Grischun sustegna il project cun ina contribuziun chantunala da maximalmain 586'000 francs. Quai èn bun 30% dals custs totals.
