Tar la Casa s. Martin a Trun datti ina midada al timun operativ. A partir dal prim da favrer surpiglia Anna Jäger la direcziun. Jäger è gia oz manadra da qualitad en chasa. Ella daventa successura da Donat Nay ch'ha manà la Casa s. Martin dapi l'onn 2017 e va en pensiun prematura.
La chasa d'attempads s. Martin a Trun ha tranter la fin da l'onn 2023 e la stad dal 2024 fatg atras in grev temp: La direcziun da la chasa, cunzunt Donat Nay, era confruntada cun la rinfatscha d'anteriuras collavuraturas e d'in medi da la chasa ch'ils responsabels na prendian betg per mauns ils problems existents. Plinavant hai dà numerusas annunzias tar il chantun. Ils responsabels han sinaquai engaschà ina persuna externa dal fatg per pudair analisar e meglierar la situaziun en la tgira. Sin basa da quell'analisa haja la Casa s. Martin tenor Patrick Schaniel, responsabel per la communicaziun da la chasa, introducì mesiras, cunzunt per meglierar la communicaziun en chasa.
Trais dumondas davart la midada al timun
RTR: L'emprim da favrer 2025 surpiglia Anna Jäger la batgetta da la Casa s. Martin. Daco è ella gist la dretga persuna per quest uffizi?
Patrick Schaniel: La rait da sanadad Surselva prenda si il manaschi operativ il cumenzament dal 2027. Nus sco instituziun ch’avain era decidì da sa participar als proxims pass avain fatg nossas ponderaziuns co ch’i guarda or. Nus avain noss maina chasa Donat Nay che giess atgnamain en pensiun la primavaira 2026. Lura avessan nus ina rusna tranter sia pensiun ed il cumenzament dal manaschi operativ. Sin il fundament da questas ponderaziuns avain nus analisà e prendì cun Donat Nay la decisiun ch'el giaja anticipadamain en pensiun e che nus midain il timun a partir da l'emprim da favrer. Anna Jäger enconuscha nossa chasa e per quest temp transitoric da bun 2 onns essan nus dal avis ch'i saja bun d'avair ina persuna ch'enconuscha il manaschi e nossas collavuraturas e collavuraturs.
Sche nus guardain enavos: Avant bun in onn ha il medi da la Casa s. Martin, Martin Tomaschett, ed era tgirunzas fatg ranfatschas envers il maina chasa. È la demissiun da Donat Nay in resultat da questa critica?
Patrick Schaniel: Quai n'è betg stà il resultat da questa critica. Questa critica menziunada è vegnida cun pliras annunzias tar il chantun tier il uffizi da sanadad ch’ha confirmà a nus questas annunzias. Dentant ha l'Uffizi da sanadad era confirmà che nus na stuain betg pigliar posiziun. Sch'i fiss stà insatge vid questas annunzias, sche lura avessan nus sco cumissiun da la chasa gì da pigliar posiziun – quai n'è betg stà il cass.
RTR: Tuttina l'onn 2023 hai dà in'unda da demissiuns e la Casa s. Martin ha stuì engaschar persunas che lavuran temporar e persunas da l'exteriur. Il mainachasa è tenor funcziun responsabel per la situaziun dal persunal?
Patrick Schaniel: Cler ch'il mainachasa è il timun operativ cun tut sias partiziuns. Questa responsabladad ha el tenor nus era adina ademplì. Nus avain uss decidi communablamain questa midada cun la pensiun prematura per uschia dar nov schlantsch a la chasa enfin tar la rait da sanadad.