La petiziun ch’è ida a fin la davosa fin d’emna ha cun 5’000 suttascripziuns in fitg grond resun. Quai conceda era il deputà e con-iniziant Fabian Collenberg. Per els saja surtut ils prims dis stà impressiunant da vesair quantas persunas che suttascrivan e sustegnan uschia l’ospital regiunal a Glion. Per els sco partida giuvna na saja quai nagina acziun politica e perquai hajan els era dumandà radund 40 persunas per ina fotografia ed in citad en chaussa e propi il resun saja stà fitg gronds, di il chanzlist da la vischnanca da Sumvitg. Cun las fatschas mussadas è quai stà fitg bain pussaivel da mussar ch’il sustegn na vegn betg sulet d’ina gruppa, mabain d’ina gronda part da la populaziun, da persunas en la tgira, ma era ordaifer e da giuven e vegl.
Betg liant per ils gremis politics
La petiziun n'ha nagina muntada politica ed è uschia era betg lianta per ils presidents communalas da la Surselva. Els survegnan tuttina ils proxims dis posta dal giuven center Surselva cun las 5’000 suttascripziuns. L’effect è speranza ch’ils responsabels vesan che l’interess vida l’avegnir dal ospital è gronds e che quai n’è betg tuttina tge che capità cun l’ospital a Glion, di Fabian Collenberg. Atgnas propostas na vegnian els betg a far, quai era en vista a l’evaluaziun actuala. Els sappian ch’in biro spezialisà saja uss londervi da far las evaluaziuns necessarias ed era la SanaSurselva e l’ospital e quai dettia era schliaziuns. La finala è cler a tuts la schliaziun preschentada duai esser pajabla per las vischnancas e cuntentar ils basegns da la populaziun. Ils resultats da l’evaluaziun vegnan spetgads la primavaira.
Or da l'archiv: