La saira d’infurmaziun e discussiun davart l'integraziun da l’ospital regiunal Samedan ha attratg la populaziun. Bun 300 persunas èn sa partecipadas a la sairada, organisada da la Posta Ladina e Gammeter Media SA, en la sala dal Rondo amez Puntraschigna.
Il president da la SGO, Christian Brantschen, ha anc ina giada suttastritgà che la fundaziun na vesia betg in'autra via che d'integrar l’Ospital regiunal Samedan en l'Ospital chantunal da Cuira – quai era en vista a las sfidas da structura da l'avegnir.
-
Bild 1 von 3. Bun 300 persunas èn sa radunadas en la sala dal Rondo amez Puntraschigna per tadlar la discussiun da podium. Bildquelle: RTR.
-
Bild 2 von 3. Ils responsabels e las responsablas da la SGO preschentan il plan d'integrar l'Ospital regiunal Samedan en l'Ospital chantunal a Cuira. Bildquelle: RTR.
-
Bild 3 von 3. L'ultim pled en chaussa han ils votants e las votantas da l'Engiadin'Ota la fin matg. Bildquelle: RTR.
Il plan d'integraziun polarisescha
Durant la discussiun ha Stefan Metzger, deputà dal Cussegl grond, fatg attent che la regiun Malögia saja ina da las regiuns las pli ritgas dal chantun Grischun. Ella pudess pia prestar in ospital regiunal independent a Samedan, di Metzger. La pussaivladad da restar independent na saja tenor sia opiniun betg vegnida ponderada avunda. Christian Brantschen ha percunter respundì che la SGO haja elavurà en tut trais variantas – era quella da restar independent. In'analisa dal gremi haja però mussà svelt che la varianta d'integraziun en l’Ospital chantunal a Cuira fetschia il pli bler senn.
Suenter la discussiun da podium èn divers or dal ravugl da l'auditori s’exprimids positiv davart il plan d'integrar envers RTR. L'ultim pled en chaussa han ils votants e las votantas da las vischnancas da l'Engiadin’Ota che vuschan fin la fin da matg. Per far il pass d'integraziun, vuli in gea da tut las 11 vischnancas. En cas d'in na veglian ins tschertgar il discurs e persvader la vischnanca pertutgada per in'ulteriura votaziun, uschè Christian Brantschen.
Integraziun duai segirar il provediment en Engiadin'Ota
Il cussegl da fundaziun da la fundaziun Provediment da sanadad Engiadin'Ota – curt SGO – è sa decis unanimamain per la varianta d'integrar l'Ospital da l'Engiadin'Ota en l'Ospital chantunal dal Grischun. Questa mesira duai segirar a lunga vista il provediment da sanadad en Engiadin'Ota ed en las regiuns cunfinantas. L'integraziun vegn sustegnida dal departament chantunal da giustia, segirezza e sanadad. La finamira è da meglierar la situaziun finanziala da l'ospital.
Ina schelta na datti betg, perquai che questa missiva che nus preschentain a la populaziun è la meglra pussaivla che nus pudain far en questa situaziun.
Quatter opziuns èn vegnidas examinadas. L'integraziun è vegnida identifitgada sco soluziun la pli effectiva. L'integraziun empermetta ina meglra effizienza, qualitad e digitalisaziun dals servetschs da sanadad.
Vischnancas stuessan contribuir pli pauc
Cun l'integraziun stuessan las vischnancas contribuir per onn 7 milliuns francs, partids tranter la cunvegna da prestaziun cun l'Ospital chantunal a Cuira cun maximalmain 5,4 milliuns francs ed ina contribuziun dad 1,6 milliuns francs a la SGO per l'administraziun e l'infrastructura da las immobiglias. Quai enstagl da 11,4 milliuns francs per la varianta da restar independent, sco ch'igl è vegnì communitgà vinavant. L'integraziun sco tala vegnia a custar 6 milliuns francs. La cunvegna da prestaziun tranter las duas partidas duai durar sis onns, dal cumenzament 2026 fin la fin dal 2031.
Las calculaziuns da la SGO sezza mussan atgnamain che sch'ins na collavura betg, fissan ils custs anc pli auts.
Plinavant duain tut las offertas medicinalas existentas vegnir manadas vinavant, dentant vegnan intginas plazzas da lavur orientadas da nov u stritgadas. Per resguardar la lescha da lavur e per ulteriuras spezialisaziuns vegnan creadas var 21 plazzas novas. Tut en tut duain cun questa fusiun però ir a perder 20 plazzas, quai surtut en il cader e l'administraziun, però cun paucas disditgas.
La fundaziun vegn ad exister vinavant e represchentar ils interess da las vischnancas. Ella vegn er a manar ils centers per persunas attempadas, spitex e posts da cussegliaziun.
Populaziun ha il davos pled
Il davos pled ha dentant la populaziun. La primavaira decidan las votantas ed ils votants da las vischnancas definitivamain a l'urna davart l'integraziun. Occurrenzas d'infurmaziun publicas èn stadas il mars. Tar l'emprima occurrenza publica a San Murezzan è l'interess però stà plitost mediocher cun radund 70 persunas preschentas. E dumondas hai dà paucas.
Per exempel, tge che capita cun il terren, nua che l'ospital è. Tant terren sco era l'immobiglia restan tenor cunvegna previsa en possess da la SGO. Sper quai è era anc vegnì punctuà che la schliaziun sin maisa pertutga sulettamain l'ospital. Ils ulteriurs objects da la SGO – sco per exempel la Spitex u las chasas da tgira Promulins e Du Lac n'èn betg tangads.