Quasi la mesadad da las commembras ed ils commembers dal parlament communal da Mustér ha abditgà lur mandat e l’entira cumissiun da gestiun, co che il president communal Renè Epp ha confermà envers RTR.
Sin il termin uffizial dals 24 da matg han 7 dals 15 commembers dal cussegl communal dà giu lur uffizi: Armin Berther, Adrian Deflorin, Edgar Durschei, Mario Flepp, Armin Manetsch, Larissa Fry Schuster e Helga Probst-Linder. Ils blers da quels suenter plirs onns esser stads commembers dal cussegl communal. Era l’entira cumissiun da gestiun che sa cumpona da trais persunas, Curdin Cajacob, Sonia Lutz-Schmidt e Flavio Murer, ha dà giu il mandat. Medemamain demissiunà ha Simon Bergamin dal cussegl da scola.
En suprastanza communala vegni tar ina roschada, in commember da la suprastanza ha abditgà sin il termin uffizial. Vinavant a disposiziun per ina ulteriura perioda d’uffizi da quatter onns stat il president communal René Epp. Las elecziuns communalas a Mustér han lieu ils 22 da settember.
Ina sumeglianta situaziun hai gia dà il 2020. Era lura ha la vischnanca da Mustér stui tschertschar novas persunas per la mesadad dals posts dal cussegl da vischnanca.
