La saira da Silvester è ina saira nua che blers osps da vacanzas, ma era autras persunas laschan ir rachetas e fieus artifizials. Uschia era a Mustér nua ch’intgins hajan surfatg l’ultim Silvester, uschia che la canera n’era betg pli normala, declera Hans Huonder, in dals con-iniziants. Perquai hajan els decis d’agir e da ramassar suttascripziuns per ina iniziativa ed in scumond total. En tut han 165 persunas suttascrit. Il motiv principal è da proteger animals da chasa, la selvaschina, ma era ord ponderaziuns dal clima e dal rument che na vegn savens betg allontanà, uschia scrivan ils iniziants en la brev surdada cun las suttascripziuns oz a la vischnanca da Mustér.
Vischnanca sto l’emprim crear lescha
Il mument ha la vischnanca da Mustér nagina lescha en connex cun il ruaus public. Ina tala lescha era vegnida refusada dal parlament communal il 2020 cun l’argument principal che la lescha na fetschia betg basegn. La vischnanca è uss sut squitsch da far vinavant, perquai il proceder da crear ina nova lescha basegna temp e tenor constituziun sto l’iniziativa vegnir tractada entaifer in mez onn, declera il president communal René Epp. Sche la lescha vegn realisada en il senn dals iniziants tras il cussegl communal ed ina nova lescha dal ruaus public, alura na vegn quella betg suttamessa al pievel. Sch’il parlament avess da far midadas alura vegniss tant l’iniziativa sco era la cuntraproposta dal parlament en votaziun a l’urna, declera Epp.
Suprastanza ha gia decretà in scumond per fieus artifizials che fan canera
Gia l’entschatta da l’onn ha la suprastanza decretà in scumond per immediat per tut ils fieus artifizials che fan canera. Quai anc il mument senza basa legala. L’iniziativa ch'è uss sin maisa va pli lunsch e pretenda in scumond absolut da tut ils fieus artifizials sin l'intschess communal. Els vegnian era a seser ensemen cun ils iniziants per pudair realisar la lescha nova el senn da l’iniziativa e per formular la lescha nova.
