La populaziun da Glion decida davart dus projects solars. I va per il dretg d'utilisaziun per la construcziun dals implants planisads sin l'alp da Schnaus e l'alp da Rueun.
La suprastanza communala ed il parlament da Glion recumondan a votantas e votantas d'approvar ils projects da l'Axpo e da dar ils dretgs da bajegiar per las duas ovras solaras. Tar la populaziun da Glion han questas ovras chaschunà grondas discussiuns a l'orientaziun publica dals 9 da november.
Arguments dals iniziants
Da vart da la vischnanca da Glion è l’argument principal ch’ins dovria entradas, pertge la situaziun finanziala na saja betg uschè buna. Sche tut vegniss realisà a moda optimala alura pudess la vischnanca da Glion quintar cun entradas annualas da dapli ch’in mez milliun francs l'onn.
Il motiv che tantas ovras vegnian planisadas en Surselva saja ch'il sulegl glischia pli savens en Surselva che per exempel en la Bassa, cunzunt l'enviern. In auter argument è stà che las ovras d’electricitad Axpo hajan gia blera infrastructura en Surselva.
Resalvas or da la populaziun
Da vart da la populaziun han ins plitost retschavì vuschs criticas. Menziunà a chaschun dad ina saira d'infurmaziun è vegnì ch'ils implants possian avair in effect negativ sin il turissem.
Er è vegni admonì e dumandà d’ina persuna sch’ins haja ina posiziun da las organisaziuns d’ambient e forsa era ina decleraziun d’intenziun che las ovras planisadas na fruntian betg sin resalvas da las organisaziuns d’ambient. Quai n'han ils responsabels da l’Axpo e da la vischnanca betg pudì confermar.
I dat duas votaziuns en chaussa
Ils 26 da november votescha Glion en in emprim pass sch'ins vul da princip laschar eriger ils dus implants solars. Sch'il suveran dat ses consentiment en la votaziun da quest november, planisescha l'Axpo las duas ovras. En il fratemp tschentan la vischnanca e l'Axpo si ils contracts che pertutgan ils dretgs e las indemnisaziuns che vegnan preschentads al suveran en ina segunda votaziun.
