Il meglier emprend'ins ina lingua cun viver ella e cun discurrer ella. Conradin Klaiss, manader da la FRR, pussibilitescha precis quai cun ils «Dis da Sentupada».
Trais dis plain program – sfundrar dal tuttafatg en la lingua e cultura sursilvana, per mintgina e mintgin ch'ha gust. Ils motivs pertge che la glieud è qua quel di èn fitg differents: Ina d'ellas è Nora Hurter da Basilea. Ella raquinta ch'ella n'haja ensasez nagina relaziun tar il rumantsch, ma tuttina haja ella vulì emprender il rumantsch.
Sco uffant hai jau guardà istorgias da buna notg per rumantsch, e lura hai jau pensà, che quai fiss er anc ina lingua che jau pudess emprender.
Chapir ina lingua vul era dir chapir la cultura. Durant quests treis dis datti differents seminaris, curs e tocs da teater. Ina gronda part da l'istorgia rumantscha èn las paraulas: «Pli baud aveva la Surselva la pli gronda collecziun da paraulas da la Svizra», declara il manader Conradin Klaiss.
Per quest intent datti er in apero che gida d'emprender d'enconuscher in l'auter. Era Sven Seitz emprenda dapi dus onns rumantsch. Ch'el fetschia progress haja el sentì dacurt en Lumnezia, raquinta Sven Seitz: «Ina giada sun jau stà en in'ustaria ed hai discurrì là in pau rumantsch cun la camariera e tut ils auters han tadlà. La glieud en ustaria è sa vulvida enturn, ha ris e ditg ch'els hajan adina plazza per insatgi che discurra rumantsch. Per mai era quai propi in segn ch'igl va ussa vinavant cun il rumantsch. Ussa ma sent jau qua da chasa.»
In'ulteriura participanta dal curs da sursilvan è Julia Wilson da l'Engalterra. Sia motivaziun è unica en cumparegliaziun cun ils auters.
Tut la glieud discurra englais. Per mai èsi in zic in protest cunter l'englais d'emprender rumantsch.
Ma tge fiss in tal inscunter senza chant? Quai chatta er il manader Conradin Klaiss: «Cun il chant cuminaivel è il nudar en rumantsch cumplet.»