La midada dal clima è ina sfida per il guaud e surtut per il guaud da protecziun. Surtut per il chantun Grischun, che dumbra dus terzs guaud da protecziun sin tut la surfatscha da guaud chantunala, è il svilup dal guaud cun temperaturas pli autas en il futur ina dumonda impurtanta. Per pudair chattar respostas sin quella dumonda èn radund 60 expertas ed experts dal guaud da protecziun s’inscuntradas per trais dis a Glion. Discutada vegn surtut la dumonda co ch'il guaud vegn a vesair ora en il futur e co ch'ins vegn a cuntanscher la finamira da garantir era en l’avegnir la protecziun da las vischnancas muntagnardas.
Il guaud da feglia vegn a dominar en il futur
La midada dal clima ha sco consequenza ch’il pign che dominescha la gronda part dals guauds sursilvans vegn a vegnir sut squitsch. Uschia vegni a dar adina dapli privel d’attatgas tras il bau scorsa, declera il professur per l’ecologia dal guaud a l’ETH da Turitg Harald Bugmann. Quai haja sco consequenza ch’ins stoppia ponderar tge far per evitar ch’il guaud da protecziun possia perder sia funcziun tras in tal eveniment. La schliaziun saja gia oz da vesair en il guaud, uschia creschian gia uss plantas da feglia, sco il ruver u l’ischi ed il tigl. Ma per garantir la regiuvinaziun natirala, quai che saja era fixà en la lescha federala da guaud, dovria mesiras, en il mument na possian las plantas giuvnas numnadamain betg vegnir grondas. Il problem principal saja la selvaschina, declera Harald Bugmann.
Selvaschina e setgira las grondas sfidas dal guaud
La problematica da la selvaschina è ina sfida surchantunala ed era surnaziunala, di Harald Bugmann. Impurtant saja che tuts tirian vi dal medem sughet e quai saja en il Grischun uss il cas, di Bugmann. La finamira saja da pussibilitar ina regiuvinaziun natirala e per far quai dovria ina reducziun dal dumber da selvaschina. Sche las mesiras actualas tanschian vegnan ins a vesair, tenor Bugmann dovria quai dentant probabel anc dapli sforzs.
Propostas per promover il guaud da l’avegnir
Il mument vegnan fatgas adattaziuns en connex cun las subvenziuns che la Confederaziun dat als chantuns per la tgira dal guaud da protecziun. Uschia vegn adattà la tgira dal guaud a la midada dal clima per pudair garantir il guaud da protecziun era da l’avegnir, di Samuel Zürcher il secretari da la gruppa svizra per la selvicultura da muntogna. Uschia saja surtut quest onn ina da las finamiras da stgaffir in'opiniun scientifica communabla ed uschia da pudair recumandar a las instituziuns las mesiras necessarias per garantir era en l’avegnir in guaud da protecziun.
