En il center da las lavurs sajan stads la tgira dal guaud da protecziun ed il mantegniment da la biodiversitad. Per la tgira hajan ils proprietaris profità da contribuziuns da la Confederaziun e dal chantun da bunamain 15 milliuns francs. A favur da la biodiversitad sajan vegnidas tgiradas radund 370 hectaras guaud – 8% damain che l'onn avant. La part principala da la tgira saja stada la promoziun da spazis da viver per cots selvadis e giaglinas selvadias, la revalitaziun da guauds pasculads e la promoziun da bostgaglia speziala.
Dapli donns pervi dal bau-scorsa
370'000 m³ laina èn vegnids utilisads, quai sajan 10% dapli che l'onn passà, scriva l’Uffizi da guaud e privels da la natira. La quantitad da laina che ha stuì vegnir pinada pervi da donns è restada constanta. Cumpareglià cun l'onn avant èn dentant ils donns chaschunads dal bau-scorsa s'augmentads considerablamain (+60 %). Quest svilup haja pliras raschuns, declera il selvicultur chantunal Urban Maissen. I haja da far cun la derasaziun dal bau, quella vegnia favurisada sch'igl è sitg ed er sch'i ha blers donns en il guaud da plantas crudadas.
Far ina prevista per quest onn saja però grev. Ils mais d'avrigl e da matg pulit bletschs hajan bain pudì franar il svilup dals baus-scorsa. Decisivas sajan ussa però las proximas emnas.
Or da l'archiv
