Per ina planta n'è betg mo l'aura actuala decisiva, di Roman Zweifel. Las plantas creschan er auter, tut tenor co ch'ils davos onns èn stads. Roman Zweifel lavura per il Institut federal per la perscrutaziun da guaud, naiv e lavinas.
Quasi tut las plantas ch'il institut ha intercurì quest onn n'èn betg creschidas tant sco en auters onns. Quai giascha tenor Zweifel vi da la sitgira d'onns passads: «Sch'i è sitg durant la stad, lura porta ina planta pli pitschna e pauca feglia il proxim onn.» La planta haja pli paucas ragischs ed eventualmain er pli paucas avainas che mainan aua tras la planta.
Tge munta quai per il guaud?
Il guaud en la bassa sa midia gia uss e s'adatteschia. Plantas da guglias vegnan adina pli savens remplazzadas da plantas da figlia, di Benno Schmid. Schmid è il pledader da Guaudsvizra, l'uniun da possessurs e possessuras da guaud. Quest svilup cuzzia tenor Schmid dentant 50 fin 60 onns ditg. Tenor Schmid stoppian ins far qua insatge per ch'il guaud na vegnia betg donnegià sin lung temp.
