La mancanza d'emprimas abitaziuns è era a Flem in grond problem. Mo 0,13% da las abitaziuns a Flem èn vidas, la fiera è quasi sitga, di il president communal Martin Hug. La vischnanca vul dentant bajegiar abitaziuns per indigens sin lur terren a Casa d'Uaul.
Igl è ina necessitad da bajegiar uschè bler sco pussaivel sin il terren che nus avain.
Per pudair nizzegiar quest terren dal tut, dovri dentant ina revisiun parziala: Il terren da la vischnanca è numnadamain sin duas parcellas separadas. A las votaziuns communalas vegn votà davart questa revisiun.
En cas ch'i dat in Gea pudess ins bajegiar 5 fin 7 ulteriuras abitaziuns, uschiglio resta quai tar 20 abitaziuns. Quellas duessan esser prontas en circa dus onns. I giess schizunt pli svelt tar in Na a la revisiun, lura pudess la vischnanca cumenzar immediat a bajegiar.
Mo in emprim pass cunter mancanza d'abitaziuns
Ils 12 da mars vegn mo votà sur d'ina adattaziun d'ina parcella. I sa tracta mo d'ina part da l'entira revisiun da la planisaziun locala. Per la vischnanca èsi impurtant per sia strategia da tegnair en il vitg famiglias e da pudair nizzegiar l'agen terren uschè bain sco pussibel.
