En Grischun datti en tut var 1'000 affars d'alpegiada, 700 alps autas e 120 alps cun signuns. En divers lieus ha la stagiun d'alp cumenzà gia pli baud ch'en media – pia l'entschatta da zercladur. Quai di il responsabel dal servetsch per l'economia d'alp dal Plantahof, Töni Gujan. Cun quai ch'igl ha dà relativ pauca naiv l'enviern passà, saja la vegetaziun gia baud stada pronta.
Setgira sco gronda sfida
Il mais zercladur è stà fitg sitg, ed er actualmain na pari betg da plover. Tenor Töni Gujan vegn quai ad esser ina gronda sfida. Ins possia actualmain anc profittar in pau da la davosa naiv da la primavaira. Quella na basta dentant betg a lunga vista.
Tar tschertas alps hajan ins construì indrizs per garantir avunda aua. En auters lieus sajan ins pront per adattar cura e nua ch'il muvel pasculescha. Dentant betg tuttas sajan preparadas medem bain, uschia Töni Gujan. Uschia possia esser ch'il muvel sto – en il cass extrem – en entgins lieus bandunar pli baud l'alp.
Persunal ed animals da rapina
In'autra sfida per bleras alps saja da chattar avunda persunal. Anc pli difficil saja, sch'ina persuna croda or. Er questa stagiun hajan intginas alps stuì tschertgar nov persunal. Surtut l'entschatta da la stagiun saja dira.
Qua vegnan ins bittà en l'aua fraida – da 0 sin 200%.
I dettia bain intgins servetschs ed ina lingia da telefon d'agid. Dentant chattar a curta vista persunas qualifitgadas saja per part bunamain impussibel. Er al Plantahof lavurian ins vi dad intginas soluziuns per la branscha.
Er ils lufs vegnan questa stagiun a procurar per mal il tgau. Intginas alps hajan er decidì da betg ir cun las nursas ad alp. Er las prescripziuns da la Confederaziun per proteger las nursas dal luf èn vegnidas pli severas. Cun gronds sforzs hajan ins sin las alps prendì mesiras pli rigurusas, per exempel saivs da protecziun pli autas.
Responsabel da mussa optimistic
Il responsabel dal servetsch per l'economia d'alp dal Plantahof, Töni Gujan, sa mussa dentant optimistic per la stagiun da stad. El quinta ch'ins vegnia bain a surmuntar ils problems – malgrà intginas sfidas grondas.
