Las prescripziuns da la Confederaziun per proteger las nursas dal luf èn vegnidas pli severas. Per proteger bain las scossas datti differentas reglas. Las nursas ston vegnir messas en saivs. Quellas saivs han dad esser minimalmain 1,10 meters autas e mintga duas emnas han las nursas da midar sectur da saiv. Lura sto il paster avair la pussibilità da passentar la notg en vischinanza da la muntanera. La scossa vess dad esser survegliada 24 uras al di.
Quellas prescripziuns èn era ina sfida per l’Alp Muot Selvas en Val Fex. Per il chau d’alp, Peter Angelini, èn las preparativas per pudair ir ad alp fitg grondas ed intensivas. Per ils 900 tocs che passentan ils trais mais in Val Fex sin l’alp Muot Selvas sto el trair passa 8 kilometers saivs e crear quatter secturs. Ina lavur che dovra strategia e forza.
