Tuttas scolastas e scolasts dumandads respundan sco or dal chanun: «Gea, mia professiun am plascha fitg. En mintga cas.» Er sin la dumonda tge che motivescha da restar fidaivel a questa professiun respundan las persunas dumandadas unisono: ils uffants. I saja bel d'accumpagnar ils uffants sin lur via. La bella vart da la medaglia traglischa pia, schizunt tut a dubel. L'autra vart da la medaglia è signada da la lavur administrativa.
La professiun è vegnida pli cumplitgada. Però puncto paja u reducziun da lavur n'è capità nagut ils ultims onns.
Ozendi vegnian scolastas e scolasts confruntads cun sfidas da tuttas varts. Per exempel n'hajan scolastas betg avunda temp da coordinar ensemen cun pedagogas curativas l'integraziun d'uffants che dovran sustegn supplementar. Uschia sa resultian sururas betg pajadas.
Er las pajas fatschentan scolastas e scolasts. Per l'ina sajan las pajas en Grischun, cumpareglià cun quellas en la Svizra tudestga, memia bassas. Per l'autra duai tgi che dat scolina e tgi che dat scola primara gudagnar tuttina bler.
La gronda part dals fastidis che scolastas e scolasts han menziunà vul l'uniun Magistraglia Grischun far frunt cun la midada da la lescha che spetga.
Revisiun parziala da la lescha da scola
Ils proxims mais spetga la consultaziun da la revisiun parziala da la lescha da scola. En vista a quella fa l'uniun diversas pretensiuns. Cun agid da quella revisiun duai er la mancanza da scolastas e scolasts vegnir cumbattida.
Nora Kaiser succeda a Laura Lutz
Nora Kaiser è la nova presidenta da la Magistraglia Grischun (LEGR). La radunanza extraordinaria da delegadas e delegads ha elegì unanimamain la suletta candidata. Ella è naschida a Zuoz e creschida si a Cuira. La dunna da 32 onns è scolasta gimnasiala e conceda ch'ella n'enconuscha betg dal tut il mintgadi en scolas primaras. Ella veglia però tadlar sin ils giavischs da scolastas e scolasts e purtar quels en la politica ed en la publicitad. Uffizialmain surpiglia ella il 1. d'avust il presidi.
Jau vi esser la presidenta da tuts e dar a tuts ina vusch.
La presidenta actuala, Laura Lutz, aveva demissiunà tar la radunanza da delegads l'october passà, quai per motivs privats. Ella era vegnida elegida sco presidenta il 2020 sco successura da Sandra Locher Benguerel.