Bunamain 140 delegadas e delegads sajan vegnids a la radunanza a Maiavilla, scriva la Magistraglia grischuna en sia communicaziun. Il record haja da far cun la revisiun da la lescha da scola ch'ins spetga en l'emprim quartal dal 2023.
La magistraglia veglia francar meglras cundiziuns da lavur en la lescha da scola. Cunzunt la mancanza da persunal d'instrucziun fetschia gronds quitads. Trais pretensiuns ha la radunanza da delegadas e delegads discutà ed approvà:
- In augment da paja: La paja duai correspunder a la media svizra.
- Ina lecziun per avair endament la promoziun integrativa.
- Meds d'instrucziun en tuttas linguas chantunalas.
Presidenta chala
Plinavant demissiunescha la presidenta da la Magistraglia grischuna. Laura Lutz chala sin la fin da l'onn da scola. Sia successiun vegn tschernida il mars ad ina radunanza da delegads extraordinaria.
