Il team dals Cuntrasts ha visità manadras e manaders da scolas en differentas regiuns dal chantun per vegnir a savair – sco i va per il mument cun lur incumbensa e cun tge sentiments ch’els guardan en il futur. En fitg bleras scolas èsi ina sfida d’occupar plazzas libras cun persunas d’instrucziun ch'han la scolaziun pedagogica necessaria. E questa situaziun daventa onn per onn pli acuta. Actualmain instruescha quasi in tschintgavel dals magisters sin in stgalim, per il qual els n’han betg la qualificaziun correspundenta. 99% da las persunas d’instrucziun han dentant in diplom pedagogic, vul dir che per exempel ina persuna cun diplom per il stgalim primar lavura sco magistra secundara u sco pedagog curativ u sumegliant.
Dapli cifras e fatgs chattais qua:
Il problem n'è betg dapertut medem grond
Interessantamain n’han betg tut las scolas ils medems problems d’occupar plazzas ch’èn vegnidas libras. I dat lieus attractivs e main attractivs. Tge giavischs e tge resalvas ch’ils magisters e las magistras futuras han e tge pretaisas areguard lur lieu d’instrucziun preferì, avain nus dumandà studentas e students da la Scol'auta da pedagogia dal Grischun.
En la scola primara da S-chanf avain nus vulì savair, sche la professiun da scolast u scolasta è daventada uschè nunattractiva? Na, è la clera resposta stada tar tut las magistras preschentas. Anzi, esser scolasta è respectivamain possia esser ina professiun da bellezza. Tge ch’è il recept da success a S-chanf, mussa l’emissiun dals Cuntrasts.
