Siglir tar il cuntegn

Schawinski/Bühler vs. Somedia La marca «Radio Grischa» è puspè libra

L’institut per la proprietad intellectuala ha dà raschun a la dumonda da Roger Schawinski e Stefan Bühler e stizza la marca «Radio Grischa», uschia che il num è puspè liber.

Igl è in ulteriur chapitel en la dispita tranter la Somedia ed il duo Roger Schawinski e Stefan Bühler che vulan fundar en il Grischun in radio. Sper il cumbat per la concessiun – ch'è suenter in vi e nà tuttina nunspetgadamain ida a la Somedia – cumbattan ils dus interprendiders da medias Schawinski e Bühler er per il num «Radio Grischa». Els vulan duvrar il num per lur nov radio. Uss ha l'institut per la proprietad intellectuala, che decida davart la protecziun da marcas, dà raschun a la dumonda da Roger Schawinski e Stefan Bühler. La registraziun da la marca «Radio Grischa» vegn stizzada ed il num è puspè liber. Quai resulta ord ina communicaziun.

Tge munta quai uss per las duas varts?

Per Roger Schawinski muntia quai ch'els possian far proxims pass. Il num saja liber ed els sajan s'annunziads per quel, ha ditg l'interprendider da medias sin dumonda.

Nus restain vinavant activ e vendin vinavant la marca «Radio Grischa».
Autur: Roger Schawinski Interprendider da medias

Da l'autra vart è la Somedia che emetta dapi il december 2024 puspè radio sut il num «Radio Grischa». Tenor Silvio Lebrument, il mainafatschenta da la chasa da medias Südostschweiz, vegn la Somedia anc ad examinar la decisiun e restar tar quel per il mument.

La decisiun n'ha nagina influenza sin il diever dal num «Radio Grischa».
Autur: Silvio Lebrument Mainafatschenta Südostschweiz

Vi e nà da la concessiun

La fin schaner aveva il Tribunal administrativ federal retratg la concessiun da radio per la Svizra Sidorientala e Glaruna dals iniziants da Radio Grischa Schawinski e Bühler & uschia dà raschun ad il recurs da la Somedia. Quai suenter che la Somedia aveva pers la concessiun.

Avant ch'il num è vegnì liber vulevan Roger Schawiniski e Stefan Bühler scumandar a la Somedia da duvrar il num «Radio Grischa». Lur plan oriund era da cumenzar a far radio en il Grischun sut quest num, la finala ha il Tribunal administrativ federal tuttina retratg la concessiun a Schawinski e Bühler ed uschia dà raschun ad il recurs da la Somedia. Quai suenter che la Somedia aveva pers la concessiun.

L'istorgia dal Radio Grischa

Avrir la box Serrar la box

Il 1988 ha Radio Grischa cumenzà ad emetter. Igl è stà l'emprim radio privat en il Grischun ch'ha emess en trais linguas durant 24 uras. Svelt è el daventà cult.

Il 2015 ha la possessura Somedia lura laschà svanir il num Radio Grischa e remplazzà quel cun Radio Südostschweiz. Quai tranter auter cun l'argument ch'i sa fa meglier cun l'entira purschida da la chasa da medias ed era cun il territori d'emetter che cumpiglia betg mo il Grischun, mabain l'entira Svizra Sidorientala.

RTR actualitad 12:00

Artitgels legids il pli savens