En ina dumonda a l'Institut per la proprietad intellectuala a Berna vegn pretendì ch'il dretg da proprietad da la Somedia per la marca Radio Grischa scrodia. Quai scriva il Sonntagsblick. Fin l’onn 2015 ha il radio da la gruppa Somedia emess sut il num Radio Grischa. Silsuenter ha il num da l'emettur midà sin Radio Südostschweiz.
Roger Schawinski sa referescha uss sin in passus en la lescha. Quel di ch’il dretg da proprietad vi d’ina marca scadia, sche quella na vegnia betg duvrada commerzialmain durant tschintg onns. Quai ha Schawinski confermà a l’agentura da novitads Keystone-SDA.
Sco quai che Schawinski haja ditg envers RTR haja el survegnì bleras reacziuns da persunas Grischunas. Bleras hajan giavischà ch'il Radio Grischa turnass puspè enavos en il Grischun. Uschia saja el vegnì sin l'idea ch'ins pudessi duvrar il num Radio Grischa empè da Radio Alpin.
Il Radio Grischa è simplamain vegnì prendì davent al Grischun ord x motivs da marketing.
Pauc plaschair da questa idea, ha Silvio Lebrument, il president dal cussegl d'administraziun da la Somedia. El manegia dentant er chi saja grev per Schawinski da simplamain pudair duvrar la marca Radio Grischun, cunquai che lez vegn anc adina colligià fitg cun la Somedia. Perquai manegia Lebrument er che Schawinski veglia uss simplamain far in zic canera e vegnir en las medias cun quest'idea.
Dad in pionier da radio avessins astgà spetgar in auter agir.
Surpraisa avant paucs mais
L'entschatta da quest onn ha l'emettur Radio Südostschweiz pers sia concessiun per ils onns 2025 e pli tard, cun la decisiun davart concessiuns da l’Uffizi federal per communicaziun Bakom. Enstagl ha l’uffizi dà la concessiun a Roger Schawinski e Stefan Bühler, per lur dumonda cun il num Radio Alpin.
Cunter questa decisiun ha la Somedia fatg recurs al Tribunal administrativ federal.