La regiun da la Svizra Sidorientala e Glaruna survegn in nov emettur da radio, num ha el Radio Alpin. L'Uffizi federal da communicaziun – BAKOM – ha surdà la concessiun per la regiun al radio da Roger Schawinski e Stefan Bühler, l'ex-schefredactur da la «Bündner Zeitung». La concessiun vala davent da l'onn 2025, fin l'onn 2034. I va per passa 2,8 milliuns francs mintg'onn. Il nov Radio Alpin remplazza uschia il Radio Südostschweiz. La finamira da Schawinski era da rumper il monopol da medias che la Somedia ha tenor el en la regiun. La Somedia distribuescha gasettas, ha emetturs da radio e televisiun, sco era ina pagina online.
Encunter questa decisiun po vegnir fatg recurs entaifer 30 dis davant il Tribunal administrativ federal.
L'argumentaziun dal Bakom
Il Bakom ha decidì uschia perquai ch'en lur valitaziun haja il Radio Alpin ademplì meglier ils criteris. Spezialmain tar criteris per l'incumbensa d'infurmaziun, sco per exempel da cuvrir il territori da provediment u da mussar motivs e connexs, haja la candidatura da Radio Alpin persvadì. Dentant era cun ademplir l'incumbensa da cultura haja Radio Alpin fatg dapli puncts. Ed era sche las annunzias dal Radio Südostschweiz ed il Radio Alpin fissan stadas equivalentas, avess il Radio Alpin survegnì la concessiun, scriva il Bakom vinavant. La lescha da radio e televisiun prescriva ch’en in tal cas saja da preferir ils candidats ch’enritgeschan il pli fitg la varietad d’opiniuns e da purschidas.
Pliras firmas ed instituziuns grischunas avevan prendì posiziun tgi ch'els sustegnan ed ils parairis èn stads cler: la gronda part sustegna RSO. Quai per exempel l'uniun purila grischuna, la firma Hamilton SA u era Gastro grischun. Dentant sco il directur dal Bakom ha ditg, n'haja il public nagina influenza tgi che survegn la concessiun. Els stoppian sulettamain dumandar las regenzas. E la regenza glarunaisa saja stada cleramain per il nov Radio Alpin e per la regenza grischuna fissan omadus stads en urden.
Tenor Maissen pudess in nov emettur contribuir a la pluralitad da radio, ha el ditg envers RTR. Uschia dettia er anc in'autra vista sin ils differents temas sper la SRG SSR e sper la Somedia.
La regenza grischuna prenda enconuschientscha
Sco quai ch'il cusseglier guvernativ Jon Domenic Parolini ha ditg envers RTR vegnia la regenza ad observar attentivamain sche las directivas da la lescha vegnan tegnidas en e sche la plurilinguitad vegn resguardada, pia sch'i vegn emess en tut las trais linguas dal Grischun.
Nov radio Alpin è anc en fundaziun
Roger Schawinksi e Stefan Bühler ston fin ils 30 da settember 2024 cumprovar ch'il Radio Alpin è fundà. L'interpresa è il mument anc en il process da fundaziun. Vul dir ch'els ston fin lura inoltrar in extract dal register da commerzi tar il Departament federal per ambient, traffic, energia e communicaziun.
Radio Südostschweiz fa vinavant
Per Silvio Lebrument èsi cler, che Radio Südostschweiz fetschia vinavant, cun u senza concessiun. «Quella obligaziun avain nus envers noss 64'000 auditurs ed audituras» vegn il president dal cussegl administrativ da la Südostschweiz Radio SA cità en ina communicaziun.
Plinavant sajan els persvas d’avair inoltrà la meglra concessiun ed èn trumpads ch’il Bakom ha dà la concessiun a Radio Alpin. Els vegnian ad examinar tut las pussaivladads giuridicas ed era duvrar quellas.
Segunda emprova da Schawinski
I n'è betg l'emprima giada che Roger Schawinski ch'ha 78 onns vul realisar in emettur da radio en questa regiun. Gia tar la davosa giada, il 2008, hai dà in procedura giudiziala, quella ha cuzzà radund 6 onns, enfin che la concessiun è vegnida dada definitivamain. Da quest temp aveva il Radio Südostschweiz anc num Radio Grischa. Il 2013 ha il Bakom lura surdà definitivamain la concessiun a Radio Grischa. «Nus quintain perquai cun ina concessiun provisorica per ils proxims onns. E che tut resta per il mument sco ch'igl è», ha Lebrument aschuntà.
Il Bakom era il 2013 vegnì a la conclusiun che la gruppa da medias Südostschweiz domineschia bain il martgà, ella na maldovria dentant betg questa posiziun.
Schawinski era lura anc ì fin davant il Tribunal administrativ federal. Ma er in recurs fin davant il Tribunal europeic dals dretgs umans a Strasbourg n'aveva la finala betg purtà la concessiun giavischada. Ed uss po Roger Schawinski sa legrar. El saja optimistic ch'els vegnan entaifer curt temp – segir sin il 2025 da metter sin chombas lur staziun da radio ed era che in recurs sco era el aveva fatg da sias uras n'avess nagina schanza.
Or da l'archiv: il cumbat ha tradiziun
