Fin mars è stà il termin da desditga per la magistraglia. Quant bler persunal che manca propi è dentant grev da giuditgar. Ch'i dettia in problem da chattar magistraglia, èn il minister d'educaziun Jon Domenic Parolini ed il president da l'uniun da mainascolas Silvio Dietrich perina.
38 plazzas sajan actualmain vacantas en las scolas popularas grischunas, quai tenor il Departament d'educaziun, cultura e protecziun da l'ambient dal Grischun. Silvio Dietrich è però da l'opiniun, che quella cifra na saja betg representativa. Blers mainascolas n'annunzian betg lur plazzas libras sin il portal dal chantun. Quai or dal motiv ch'i dettia savens gnanc ina annunzia per las plazzas vacantas.
Pir il cumenzament?
Divers facturs per la problematica gioghian ina rolla, di Jon Domenic Parolini. In saja la demografia: dapli magistraglia che va en pensiun e pli paucas persunas d'instrucziun che entran en il mund da lavur.
Cun quai ch'i dat adina pli blers da la generaziun dals babyboomers che van en direcziun da la pensiun, resta il dumber da studentas e students a la Scola auta da pedagogia dal Grischun quasi tuttina. Latiers vegn che adina dapli scolasts e scolastas lavuran en in pensum parzial.
Flexibilitad en stanza da scola
La schliaziun pratica en las scolas saja da metter ensemen classas, auzar ils pensums e midar las incumbensas. Sper quai vegnan er occupadas persunas che n'adempleschan betg las cundiziuns da scolaziun per dar scola. Quant savens che quai capita pon ins mo sminar. Il chantun dat mintg'onn tranter 200 e 300 lubientschas a persunas che n'adempleschan betg las cundiziuns pretendidas. L'Uniun da magistraglia grischuna scriva che quai saja savens in sforz per ils teams en scola dad occupar tut ils pensums libers.
Per procurar per novas forzas da lavur vul Jon Domeni Parolini cunzunt propagar la professiun pli fitg, e mussar las varts positivas da la professiun. En la discussiun actuala davart la revisiun da la lescha da scola vul el s'engaschar per in auzament da pajas. Silvio Dietrich di, ch'ins stoppia er lavurar vi da meds da scola rumantschs.
L'emprim sboz da la revisiun da la lescha revidida preschenta la regenza ils proxims mais.
Far pli attractiv la lavur
Era la cussegliera naziunala Sandra Locher Benguerel vesa il basegn d'agir. Tenor ella stoppian ins far pli attractiv la lavur. Quai per exempel cun distgargiar las scolastas e scolasts. Ils davos onns vegnia spetgà adina dapli dad ellas ed els, saja quai en connex cun l'individualisaziun, differentas furmas d'emprender u la lavur cun ils geniturs. Plinavant dovria dapli pedagogs curativs e dapli paja, cunzunt tar scolastas e scolasts da la scolina.
Or da l'archiv
