Quella decisiun na cuntenta dentant betg a la represchentanta da la magistraglia Sandra Locher-Benguerel. La cussegliera naziunala grischuna che lavura sezza sco magistra ed è era vicepresidenta da la Scola auta da pedagogia dal Grischun a Cuira, è ina da las paucas che ha vuschà cunter la proposta. Ina part da la savida generala ch’ins dovra mancass a las persunas. Quella ston ins avair e stuess lura vegnir purschida en curs spezials a la PH. Quai na saja betg ina buna schliaziun, di ella.
La cussegliera naziunala grischuna da la Partida socialdemocratica vesess plitost l’opziun ch'i duess dar ina nova maturitad professiunala cun la direcziun pedagogia. Ina tala opziun è gia en discussiun sin livel politic. Vairamain beneventescha Locher-Benguerel numnadamain, che persunas da differentas professiuns fan il pass en la pedagogia.
Adina dapli magisters e magistras mancan ils proxims onns
La mancanza da magistraglia è tut tenor regiun acuta. Uschia di la cussegliera naziunala, ch'en il chantun Berna dat mintga 10avla persuna scola senza avair il diplom correspundent. E tenor l'Uffizi federal da statistica datti en ils proxims 10 onns in augment da 6% da scolaras e scolars. Quai che procura per anc dapli mancanza da magistraglia. Perquai saja quai impurtant da guardar uss la dumonda pertge che diversas persunas bandunan la chasa da scola per i'autra professiun. A maun da quellas datas sa possia lura far in pachet da mesiras per lavurar encunter la mancanza da magistraglia.
Il Cussegl dals chantuns duai anc decider
Era sche la magistra e cussegliera naziunala è encunter la decisiun dal Cussegl naziunal, da pudair prender la via directa cun la maturitad professiunala, è la gronda part dal cussegl persvas che quai gida era encunter la mancanza da persunal en la scola. Dentant avant che la decisiun è definitiva sto anc il Cussegl dals chantuns decider en chaussa.
