Gratular mo pli online e betg pli via radio RTR ... Tgi ch'ha tadlà il mardi radio suenter las 9:00 u vesì nossas lingias grassas online, lez ha forsà piglià in zichel tema. Naginas gratuaziuns pli al radio?
Suenter quest'annunzia, avain nus survegnì intginas reacziuns. «È quai propi vair u ina sgnocca d'emprim d'avrigl?», ha ina auditura scrit u «avrigl, avrigl» ha in'autra persuna gia speculà. E gea, igl è propi stà ina sgnocca dal prim d'avrigl. Las gratulaziuns en il radio RTR datti natiralmain vinavant.
Voss resuns èn dumandads
Er sche las gratulaziuns vegnan emessas en avegnir en il radio, è RTR londervi da repassar il raster da radio (tge vegn emess cura?). E latiers ans interessa natiralmain era Vossa opiniun – oz en spezial Voss avis davart l'emissiun gratulaziuns.
- Tge plascha spezialmain vi da l'emissiun?
- Tge pudess ins midar?
- È il temp d’emissiun ideal?
- Giavischar musica era via whatsapp?
- Pudair trametter messadis orals via whatsapp?
Noss schefredactur, Flavio Bundi, sa legra sin Voss resuns – via mail (flavio.bundi@rtr.ch) u era via telefon (058 136 30 00).
Cunquai che RTR ha gia annunzià ina nova mesira da spargn il glindesdi, dentant senza scriver per tge ch'i va, è la Quotidiana per exempel gia crudada en ed ha publitgà quest annunzia dad RTR en la gasetta:
Era sche quai è be stà ina sgnocca, spargnar sto RTR tuttina ...
RTR sto spargnar
Raschun per las mesiras da spargn en l'entira SRG SSR èn pli bassas entradas da la cumpensaziun da chareschia sco era pli paucas entradas da reclama.
Per dumagnar quests respargns ha Radiotelevisiun Svizra Rumantscha elavurà in program da spargn. Quel ha tant consequenzas sin la purschida, l'infrastructura sco era sin las plazzas. En tut vegnan quatter plazzas cumplainas stritgadas il 2025. Quellas pon vegnir reducidas entras la fluctuaziun, pia senza relaschadas. Quai correspundia ad ina reducziun da persunal da 4%. Era questas mesiras ha RTR annunzià l'october passà.
Tenor il directur da RTR, Nicolas Pernet, vegnia puncto finanzas anc pli stretg a partir dal 2027. Lura cumenzan numnadamain las reducziuns da las taxas ch'il Cussegl federal ha decis. La SRG SSR ha lura a disposiziun pli pauc daners. Tge che quai munta concret per la purschida rumantscha n'è fin uss anc betg cler. Questa discussiun politica davart tge che RTR porscha e tge betg pli, stoppia anc vegnir fatga.
Or da l'archiv: