La taxa da radio e televisiun duai vegnir reducida da 335 francs sin 300 francs per onn, quai a partir dal 2029. Plinavant duain pli paucas firmas stuair pajar la taxa. Quellas midadas ha il Cussegl federal dà la mesemna en consultaziun, la consultaziun va fin il prim da favrer 2024.
È l'iniziativa 200 francs bastan giud maisa?
L'iniziativa n'è betg giud maisa. La SRG SSR beneventa dentant la decisiun dal Cussegl federal da refusar ella. Ma la SRG SSR prenda er enconuschientscha da las mesiras proponidas cun gronds quitads. Quellas avessan inevitablamain consequenzas per l'offerta, per il persunal e per la structura da la SRG SSR.
Tge muntass la reducziun per la SRG SRR, stuessan tut las unitads d'interpresa spargnar?
La proposta dal Cussegl federal muntass var 170 milliuns francs main entradas, latiers anc 20 milliuns francs main entradas da reclomas, vul dir totalmain in minus da var 190 milliuns francs. Quai avess effects interns ma er externs, i dat secturs dependents da la SRG SSR sco il sectur da cultura, il sectur da sport, festivals da musica u er il film svizzer. Igl è d'evaluar da nov nua e co spargnar.
Tge vuless quai dir per RTR, dessi vinavant il Telesguard u las gratulaziuns?
Per vegnir uschè concret èsi anc memia baud. Ins sto analisar sco ch'ins pudess spargnar. Il Cussegl federal ha dentant ditg ch'i saja impurtant ch'i dettia vinavant in'offerta decentrala e cumplessiva en tut las quatter linguas. Las regiuns èn ina part ferma da RTR, nus savain tge èn las tematicas che occupan la glieud.
Cussegl federal cunter iniziativa 200 francs bastan
In dals motivs per sbassar la taxa è da rebatter l'iniziativa da 200 francs, che vul sbassar la taxa bler pli fitg. Sco il Cussegl federal scriva avess quella in grond effect sin la purschida publicistica e las ragischs regiunalas da la SRG. Il Cussegl federal na propona betg ina midada da la Constituziun federala u d'ina lescha, cunquai che quellas cuntrapropostas stuessan ir atras il parlament, u schizunt davant il pievel. I duai dar ina midada da l'Ordinaziun da radio e televisiun, uschia ch'il Cussegl federal po era vinavant sez decider quant autas che las taxas da radio e televisiun èn.
La taxa per chasadas duai vegnir sbassada en dus pass, ed a partir dal 2029 muntar a 300 francs. Era interpresas duain profitar. Uschia vul il Cussegl federal auzar la svieuta minimala, per ch'ina firma sto pajar taxa da radio e televisiun. Quella è il mument tar 500'000 francs, en il futur duai il cunfin esser tar 1,2 milliuns francs.
