Per dumagnar quests respargns ha Radiotelevisiun Svizra Rumantscha elavurà in program da spargn. Quel ha tant consequenzas sin la purschida, l'infrastructura sco er sin plazzas. En tut vegnan quatter plazzas cumplainas stritgadas il 2025. Quellas pon vegnir reducidas entras la fluctuaziun, pia senza relaschadas. Quai correspundia ad ina reducziun da persunal da 4%, scriva RTR en ina communicaziun.
Reducziun da purschida
I na giaja betg da realisar ils respargns senza consequenzas per la purschida. Concret vegn l'emissiun da stad «sil punct» stritgada. I vegnia però a dar vinavant durant il temp da stad istorgias en furma da video, quai sur las plattafurmas digitalas enstagl en la televisiun. Er la purschida per uffants vegn reducida fermamain. Uschia na vegni betg pli a dar films animads sco per exempel ils «babulins». Er la previsiun da l'aura en l'emissiun da «Telesguard» scroda a partir dal 2025. Er tar il program da radio vegni a dar adattaziuns, co quellas vesan or n'è uss dentant anc betg cler.
Tenor il directur da RTR Nicolas Pernet vegni puncto finanzas anc pli stretg a partir dal 2027. Lura cumenzan numnadamain las reducziuns da las taxas ch'il Cussegl federal ha decis, pia a SRG SSR ha lura a disposiziun pli pauc daners. Tge che quai munta concret per la purschida rumantscha n'è ussa anc betg cler. Questa discussiun politica davart tge che RTR porscha e tge betg pli, stoppia anc vegnir fatga.
