La proposta dal Cussegl federal avess consequenzas massivas per il program ed il persunal, scriva la SRG SSR. Cun la reducziun da las entradas da reclama e cun stritgar la gulivaziun da la chareschia mancassan a la SRG SSR a partir dal 2027 fin 240 milliuns francs. Radund 900 plazzas stuessan vegnir reducidas pass per pass sur tut las regiuns. Quai scriva la SRG SSR en sia posiziun en la procedura da consultaziun tar las propostas dal minister da medias Albert Rösti.
Cuntramesira tar l'iniziativa «200 francs bastan»
Il Cussegl federal propona sco cuntramesira tar l'iniziativa «200 francs bastan» da sbassar las taxas da Serafe dad actualmain 335 francs per chasada e per onn sin 300 francs. Ultra da quai duain interpresas cun ina svieuta da fin 1,2 milliuns francs esser deliberadas da las taxas.
L'iniziativa che prevesa da sbassar las taxas da Serafe sin 200 francs per onn e per chasada sco era da stritgar las taxas per tut las interpresas, refusa la regenza federala percunter.
Nagina gulivaziun da la chareschia e damain entradas da reclama
Betg mo il budget sco tal vegniss pli pitschen. Vitiers vegniss er anc la chareschia e la reducziun spetgada tar las entradas da reclama. Il Cussegl federal ha gia decis da betg adattar la taxa da medias ch'è actualmain sin 1,25 milliardas francs ad onn a la chareschia.
La SRG SSR pudess il meglier far frunt a questa «iniziativa radicala» cun ina ferma purschida, che creeschia ina plivalur persunala e sociala, scriva l’interpresa en la communicaziun. Il medem mument valia da realisar vinavant la transfurmaziun da la SRG SSR. Cunter quella stettia la cuntraproposta da reducir las taxas dal Cussegl federal.
D'ina chasa da medias publica sauna e finanziada solidamain profitescha l'entira plazza da medias svizra.
«Ina democrazia viva dal fatg che las burgaisas ed ils burgais èn bain infurmads. En in temp, en il qual las medias han da cumbatter cun problems da finanziaziun creschents e cun la reducziun da plazzas, èsi fauss da flaivlentar massivamain la SRG SSR», vegn il president dal cussegl d’administraziun da la SRG SSR, Michel Cina, cità en la communicaziun.
Ed il directur general Gilles Marchand accentuescha: «D'ina chasa da medias publica sauna e finanziada solidamain profitescha l'entira plazza da medias svizra.» La SRG SSR fetschia tut per cumpensar la gronda reducziun da sias entradas da reclama. Però: «In’ulteriura flaivlezza avess in effect negativ sin la qualitad da las prestaziuns da program e quai en tut las regiuns. A disfavur dal public.»
