Tenor il nov rapport na vai betg uschè bain cun il guaud svizzer. Las expertas ed ils experts manegian che noss guaud è daventà pli flaivel. Quai or dal motiv ch'i haja dà ils ultims diesch onns dapli malauras, setgiras ed incendis da guaud. Quests eveniments sajan per part consequenzas da la midada da clima. Ma er il bau scorset e sumegliants animals pitschens u bulieus hajan fatg donn al guaud.
Ma i da era puncts positivs: la biodiversitad en ils guauds saja creschida levet dapi l’ultim rapport il onn 2015. Uschia dat quai dapli utschels da guaud, lindornas e mistgel. Quai ha da far bler cun la laina morta che vegn laschada pli savens en il guaud. Mantuns da laina morta porschan in bun lieu da viver per blers animals pitschens.
Il guaud grischun en bun stadi – però bainbaud forsa dapli feglia che guglias
Il chantun Grischun e ses guaud èn en in bun stadi, manegia il manader da l’uffizi per guaud e privels da natira, Urban Maissen. El manegia ch'ils ultims 30 fin 40 onns saja il guaud en il Grischun vegnì tgirà da moda fitg effizienta. La sfida è tenor Urban Maissen da mantegnair guauds resistents. In exempel èn ils guauds da protecziun che protegian vischnancas da lavinas, bovas e malauras. In punct central saja qua la regiuvinaziun dal guaud - i dovra pia avunda plantas giuvnas. Ma precis quellas rusigna la selvaschina fitg gugent. Cun regular la selvaschina pon ins però diminuir ina part dals donns.
Il guaud è vegnì tgirà ils ultims 30 fin 40 onns fitg effizient ed effectiv.
Er la midada dal clima è in aspect ch'ins na po betg emblidar. Cun la midada dal clima sa midan era las premissas per las plantas. Il pign è per exempel ina planta cun ragischs fitg superfizialas. Perquai ha il pign fadia cun setgiras che pudessan vegnir pli savens cun la midada dal clima. Per autras plantas pon questas premissas però esser idealas. Uschia manegia Urban Maissen che il guaug grischun pudess en l'avegnir eventualmain avair dapli plantas da feglia che plantas da guglias.
Impurtant saja da promover plantas che cumportan bain era in clima pli sitg e chaud, per che noss guaud restia er en l'avegnir resistent e varià.
Cuntrasts – co statti cun il guaud en il Grischun
