Sch'igl ha memia blera selvaschina na po il guaud betg sa regiuvinar. Quai è il facit general dal rapport da guaud e selvaschina ch'il chantun ha preschentà oz ad Andeer. Memia blers animals maglian las plantinas e donnegian bostgs giuvens cun paletschar. Per ch'il guaud resta intact dovria la dretga ballantscha.
Indizis positivs en il nord ...
En la regiun Rain Posteriur e Moesano sa mussan dus maletgs. En la Val Schons per exempel na sa regiuvinescha il guaud betg propi. I dettia dentant en plirs lieus indizis da meglierament. Quai saja surtut ina consequenza da mesiras da chatscha e construcziuns entaifer il guaud. Quellas mesiras valia da mantegnair. In ulteriur factur saja il luf. Grazia a quel saja la situaziun da la selvaschina sa midada ils davos onns – ella n'è betg pli concentrada en in lieu.
... negativs en il sid
En la Mesolcina e Calanca saja la situaziun pli critica. Be cun mesiras da protecziun che chaschunan gronds custs saja gartegià da garantir ch'il guaud mantegnia sia funcziun. Il chantun vul perquai ch'i vegnia sajettà en questas regiuns dapli tschiervs, tut tenor er dapli chamutschs. Ils plans da chatscha sajan vegnids adattads.
Collavoraziun dals uffizis
Ils dus uffizis da chatscha e quel da guaud lavuran fitg stretg ensemen han punctuà ils dus manaders Adrian Arquint ed Urban Maissen. Là nua ch'il plan da sajettar vegn ademplì ha sa mussà ch'il guaud sa regiuvinescha bain, impurtant saja in monitoring, uschia ils dus menaders.
Il rapport da guaud e selvaschina è vegnì fatg cun las vischnancas sco era cun proprietaris da guaud. Cun il rapport vegnan plinavant fixads las finamiras per mantegnair ils guauds da protecziun. Mesiras pertutgan per exempel ils plans da chatscha, mesiras per regiuvinar il guaud, plantar plantinas, mesiras da construcziun ubain er da tagliar laina. Per mintga surfatscha da guaud datti in plan. Per che las mesiras hajan success, dovria dentant l'engaschi da tut ils participants. Plinavant dovri temp. In guaud na sa regiuvinescha betg dad in di sin l'auter.
Adattà al tema
Dus terzs dal guaud grischun èn guaud da protecziun. Il guaud grischun è dentant er en ina fasa da midada. La midada dal clima lascha svanir adina pli fitg ils pigns, persuenter sa derasan adina dapli plantas da feglia sco per exempel il ruver.
