Cunvegna da prestaziun - Il guaud sa mida ed uschia era la cunvegna

Il chantun Grischun ha decretà la nova cunvegna da prestaziun per la tgira e surveglianza dals guauds. En singuls reviers forestals datti in augment dal pensum, ma sur tut il chantun Grischun vegnan a lavurar sco enfin ussa radund 90 selviculturs.

Las sfidas restan er en l'avegnir grondas, il midament dal clima fa fastidi als guauds grischuns. Ils guauds han ina gronda impurtanza, la segirezza, la tgira e cultivaziun, la preparaziun in vista al midament dal clima e finalmain il bau-scorsa dattan en avegnir gronda lavur. La nova cunvegna da prestaziun regla oravant tut il sistem d’indemnisaziun tenor la prestaziun actuala da mintga revier communal dal Grischun, declara il selvicultur chantunal Urban Maissen.

Selviculturs communals èn persunas fitg ferm integradas en lavurs communalas che n’han per part betg propi da tge far cul pensum forestal, quai vegn ad esser ina gronda sfida en l'avegnir. Il selvicultur è tenor Urban Maissen principialmain responsabel per lavurs forestalas.

Dapli selviculturs a Scuol

La vischnanca da Scuol ha la pli gronda surfatscha da tut la Svizra. En l'avegnir vegnan perquai a lavurar trais selviculturs ed ina selvicultura.

Per il manader da l'uffizi forestal Antonin Hugentobler èsi impurtant d'avair il temp per far ina buna planisaziun. Fin ussa sajan ins permanent mo vi da stizzar il fieu e far las lavurs las pli impurtantas. Per Hugentobler èsi da grond’impurtanza ch'il selvicultur na saja betg mo en biro sco administratur. Igl è impurtant d'esser en ils guauds ed observar co la natira sa mida per emprender da questas observaziun, declara Hugentobler.

Or da l'archiv: