Sch'ins discurra da bulieus han ins subit preschent il maletg da bulieus che creschan en ils guauds. Ma i dat era bulieus dad aua. Tenor Andreas Bruder che lavura a l'Institut per microbiologia a la Scola Auta spezialisada da la Svizra Sidorientala (SUPSI) a Mendrisio tutgan quests bulieus tar la medema gruppa sco ils bulieus che nus enconuschain or dal guaud, ha el declerà al schurnal regiunal da SRF.
Igl èn autras cumparsas e quellas èn microscopicas. Adattadas a la vita en l'aua.
Blera savida davart ils bulieus da l'aua e lur biodiversitad, la derasaziun e las interacziuns cun autras spezias na datti anc betg. Interessantamain stat l'Engiadina dapi il cumenzament la perscrutaziun ecologica da bulieus dad aua var 80 onns en il focus dals pioniers. Il Parc Naziunal Svizzer en Engiadina è in punct central davent dal cumenzament da quest champ da perscrutaziun fin a las stentas actualas per sviluppar la protecziun da las spezias da questa gruppa.
Cun questas perscrutaziuns saja insatge daventà cler. Bulieus d'aua han ina rolla ecologica impurtanta en ils auals ed en autras auas pitschnas. Sco bulieus en il terren dal guaud reduceschan els per exempel feglia e roma e mettan a disposiziun questas resursas ad autras creatiras.
Cun las qualitads ch'els han, pon els per exempel demontar encims ord il material da las plantas sco feglia u lain. Uschia pon els decumponer quai ed utilisar las resursas per els sezs u metter a disposiziun per auters sco ad insects.
Sco quai che Andreas Bruder ha declerà envers il schurnal regiunal dad SRF, na sappian els betg tge influenza che quests bulieus d'aua hajan sin l'entir sistem ecologic, sch'els na fan betg las perscrutaziuns.
En vista globala èn questas perscrutaziuns plitost ina nischa. I na dat betg bleras gruppas che sa fatschentan cun quest gener da perscrutaziun. Quai è in dals motivs pertge ch'i dat anc grondas largias da savida en quest sectur.
