Stefan Engler
En l'avegnir pudess vegnir stretg cun l'electricitad per l’enviern. Perquai saja quai impurtant dad investir oravant tut en energia regenerabla en Svizra sez. Vegnir pli independent dals imports saja in pass per pudair garantir dapli electricitad, di il cusseglier dals chantuns da l’Allianza dal Center Stefan Engler. A curta vista stoppian ins spargnar electricitad ed investir en Svizra. Il pli grond potenzial vesa el tar la fotovoltaica en las muntognas e sin tetgs. Dentant vesess Engler era la pussaivladad d'engrondir ils mirs dals lais da fermada per dapli capacitad per forza idraulica.
Kurt Egger
Ch’ins stoppia investir en fotovoltaica sustegna era il cusseglier naziunal da la partida verda da la Turgovia Kurt Egger. El è tranter auter cussegliader per energia ed ambient e commember per la cumissiun d’energia. Ils projects per fotovoltaica stoppian però ir maun en maun cun la biodiversitad e cun l’agricultura. Ins na possia simplamain betg fabritgar senza prender resguard. Plinavant stoppian ins era – sper la tematica d'electricitad – remplazzar las pignas da gas cun alternativas regenerablas, er per vegnir pli independent da l'exteriur.
Marco Chiesa
La Partida populara svizra dentant guarda critic sin la strategia d’energia. Uschia di Marco Chiesa, il president da la partida, che quella haja tranter auter procurà ch’ins è en ina tala situaziun. El vesa ina soluziun per garantir avunda electricitad en forza nucleara. Il sustegn dentant da las autras partidas per quell’idea è pitschen – sche betg nunexistent.
