Sch'i dat catastrofas d'aua, da l'aura u fieus ed objects vegls da valur survegnan donns u pudessan vegnir donnegiads, alura vegnan els ed ellas en acziun: La protecziun dals bains culturals – ina unitad speziala da la protecziun civila. A Brinzauls han els per exempel gidà da demontar e far midada cun l'altar da la baselgia, cura che la situaziun en il vitg è vegnida pli precara. Suenter las auas grondas a San Murezzan hani gidà da demontar e sientar la tschiffada da la funtauna «Maurizius».
La protecziun dals bains culturals na vegn dentant betg mo en funcziun tar catastrofas grondas. Las davosas emnas han els sustegnì l'archiv da la citad da Cuira durant far midada.
La protecziun dals bains culturals en acziun
-
Bild 1 von 3. Ils commembers da la protecziun dals bains culturals transportan stgatlas da l'archiv da la citad da Cuira cun agid d'ina colonna d'umans. Bildquelle: RTR.
-
Bild 2 von 3. Ils documents pachetads vegnan cuvrids e preparads per il transport. Bildquelle: RTR.
-
Bild 3 von 3. Cun agid da la protecziun dals bains culturals vegnan ils documents transportads davent da l'archiv vegl da la citad en il nov lieu. Bildquelle: RTR.
Co vegnir tar la protecziun dals bains culturals?
Sco emprim frequentan ins la scolaziun da basa per la protecziun civila. Suenter quellas duas emnas han persunas interessadas la pussaivladad da sa scolar vinavant. Questa scolaziun supplementara cuzza tschintg dis e l'ultim di vegn exercità in cas d'urgenza. A la fin da lur scolaziun èn las participantas ed ils participants spezialistas e spezialists da bains culturals. Premissas spezialas na dovran ins betg per pudair lavurar per questa unitad. Bainvissas èn dentant persunas che mussan interess vi da la cultura e l'istorgia, u che lavuran en in mastergn adattà, sco per exempel in'architecta u in magister d'istorgia.
Nus duvrain persunas cun in fin sentiment, cun ina buna motorica fina.
Durant circa in'emna ad onn ston ils commembers e las commembras lura entrar en servetsch. E quel po esser en ils pli differents lieus: en in museum, ina baselgia, ordadora ubain era sut terra.