La tschiffada da la funtauna «Maurizius» a San Murezzan era vegnida auzada ord sia fixaziun il fanadur 2024. Quai suenter las auazuns ch’han donnegià l’edifizi dal Forum Paracelsus e mess sut aua las localitads enfin 1,5 meters otezza.
Cun in’acziun da spezialists da la protecziun civila era la construcziun da lain vegnida demontada part per part e messa en salv per sientar en cundiziuns controlladas. Ussa - otg mais pli tard - èn las localitads dal Forum Paracelsus a San Murezzan puspè sitgas e la sanaziun bunamain terminada.
Montar 100 tocs ad in total dad 1,5 tonnas
En ina lavur minuziusa vegn la tschiffada da funtauna, ch'ha passa 3400 onns, puspè montada. Ils radund 100 tocs lain da laresch èn numerads ed han in pais total da radund 1,5 tonnas. Grazia ad ina documentaziun exacta cun fotografias d’avant 10 onns, mettan ils experts puspè ensemen la construcziun, sumegliant ad ina cumbinella u in gieu da tetris. En tut vegn fatg quint cun lavur da trais spezialists durant bun dus dis. Cura ch'il museum Forum Paracelsus avra puspè sias portas, n'è betg anc enconuschent. Singulas lavurs da sanaziun dal bajetg n'èn betg anc finidas.
-
Bild 1 von 11. Il manader da construcziun Christian Gartmann stat en il truntg svidà l'onn 1907. Chattà en quel han ins er rauba dal temp da bronz. Bildquelle: Monika Oberhänsli, archeologa.
-
Bild 2 von 11. Mintgin dals passa 100 tocs è numerà . Bildquelle: RTR.
-
Bild 3 von 11. L'archeologa Monika Oberhänsli ha perfin scrit sia lavur da master sur da la tschiffada da funtana «Mauritius». Bildquelle: RTR.
-
Bild 4 von 11. Cura che la tschiffada è montada cumplettamain, vegn ina paraid da vaider a la protegir. Bildquelle: RTR.
-
Bild 5 von 11. Duas hallas plainas per deponer ils tocs da la tschiffada, avant ch'ella vegn puspè montada. Bildquelle: RTR.
-
Bild 6 von 11. Sco in gieu da tetris sumeglia sia lavur, uschè il spezialist da montascha Christian Alder. Bildquelle: RTR.
-
Bild 7 von 11. Fotografias d'avant 10 onns han documentà era las pli pitschnas parts. Bildquelle: RTR.
-
Bild 8 von 11. Fixar ils tocs da laresch senza duvrar guttas u far foras en il lain è ina sfida. Bildquelle: RTR.
-
Bild 9 von 11. La tschiffada da funtauna era durant onns exponida en il Museum Engiadinais a San Murezzan, avant ch'ella ha fatg midada en il museum Paracelsus. Bildquelle: RTR .
-
Bild 10 von 11. Christian Alder e Monika Oberhänsli vid la montascha d'in urdegn dal temp da bronz. Bildquelle: RTR.
-
Bild 11 von 11. La tschiffada è puspè installada e pronta per ils visitaders e las visitadras. Bildquelle: Servetsch archeologic chantunal GR.