L'archiv da la citad da Cuira – in dals archivs ils pli impurtants da la regiun – fa midada en ina nova localitad al «Hofgraben 3». Durant 550 onns, pia dapi il temp medieval, è la chasa communala stada il dachasa per l'ierta istorica da la citad Cuira. Schegea che la chasa communala ha ina muntada emoziunala per l'archiv, porta la midada dapli avantatgs. L'infrastructura n'è simplamain betg pli adattada als basegns actuals da l'archiv da la citad.
Perquai ha la populaziun da Cuira decidì il settember dal 2017 ch'ils stgazis da l'archiv da la citad drovian in nov suttetg – passa 65% èn stads a favur da la midada e la cumpra da las novas localitads en il bajetg da la firma d'informatica Inventix.
Infrastructura pli moderna per stgazis prezius
Radund 3'000 meters d'actas vegnan actualmain transportads en la nova localitad al «Hofgraben 3». Perquai vegn la midada era cuzzà bun 7 emnas, numnadamain dals 17 da favrer fin ils 4 d'avrigl. Fin lura resta la sala da lectura da la chasa communala serrada. Cun tutta forza sa concentrescha in team da quatter persunas sin la midada da localitad, per che l'archiv po puspè arver al nov lieu ils 7 d'avrigl, sco planisà.
-
Bild 1 von 4. Katarzyna Mathis, Hans Martin Meuli e Claudio Cugnach cun l'emprim document da l'archiv da l'onn 1464. Bildquelle: RTR.
-
Bild 2 von 4. Katarzyna Mathis en la stanza da lectura veglia. Bildquelle: RTR.
-
Bild 3 von 4. Hans Martin Meuli, president da la citad da Cuira sa legra che la midada fa progress. Bildquelle: RTR.
-
Bild 4 von 4. Era Claudio Cugnach, cumandant da la protecziun dals bains culturals, fa part a la midada. Bildquelle: RTR.
La stenta renda dentant: En la nova localitad spetgan otg magasins moderns e cundiziuns optimalas per archivar, utilisar e conservar l'inventari. Tar quest inventari tutgan sper document era fotografias, cartas, plans da citad e graficas. Il document il pli vegl va enavos fin l'onn 952 – in inventar da gronda impurtanza pia. Perquai èsi era uschè impurtant che quest inventar vegn magasinà en in lieu adattà.
Igl è previs da festivar l'avertura da la nova localitad da l'archiv da Cuira ils 12 fin ils 16 da matg cun visita cun guid per la populaziun.
Or da l'archiv: