Cura che Roger Meier è stà tranter 17 e 18 onns vegl, è el sa tschentà sin via. El è creschì si tar ina famiglia da tgira, nua ch’il bab era violent. El haja bavì e pitgà Roger Meier. Da lez temp è il giuven era vegnì en contact cun alcohol ed è daventà il medem tip sco ses bab da tgira. Suenter in di nua ch’el aveva dispita en sortida, tar la lavur ed a chasa s’ha el defais e pitgà fermamain ses bab da tgira. Suenter è el scappà da chasa ed è sa tschentà sin via.
Jau ma sentiva per l’emprima giada en mia vita segir.
Durant ch’el n'aveva nagin dachasa, ha el fatg vinavant cun ses emprendissadi sco muliner. La glieud en l’affar n'han betg badà quai. Tranter auter perquai ch'il Bernais ha emprendì insatge durant viver sin via.
Jau hai emprendì: stgarpas nettas, vestgadira netta e diesch francs en il satg – e tut è en urden.
Roger Meier ha durant l’emprendissadi durmì en in vegl camiun en ina remisa. Tar la lavur ha el gì ina maschina da lavar, ina duscha ed el ha survegnì ina buna paja sco emprendist. Mintga di è el vegnì diesch minutas pli baud ch’ils auters, aveva gia tratg en il vestgì suren ed aveva en maun in café – uschia saja el mo stà il spinochel ch’era adina memia baud, dentant mai quel senza tetg.
Ina decisiun fallada
Suenter il success en l'emprendissadi, cun la segund meglra nota da l’annada en Svizra, èsi ì engiu. Roger Meier ha prendì ina decisiun fallada: cumenzà a prender drogas. Per finanziar quellas haja el cumenzà a rumper en ed engular.
Curt avant mes 20avel anniversari è la polizia vegnida. Els m’han chattà cun 54 kilos – duas emnas pli tard fiss jau stà mort.
Alura ha Roger Meier stuì ir nov mais en arrest d’inquisiziun. Quai era il medem mument er ina dischintoxicaziun da las drogas. Suenter era ses credo da restar invisibel, el vuleva evitar da stuair ir en ina chasa da tgira. Uschia ha el en tut vivì 22 onns sin via. Avant sis onns è Roger Meier s'inamurà, ha chattà cun agid in'abitaziun ed ussa viva el en ses paradis, sia abitaziun.
