Sandra Maissen vul vegnir la proxima presidenta communala da Cuira. Sia partida ha nominà ella unanimamain sco candidata per las elecziuns ils 9 da zercladur 2024. Quai ha l'AdC da Cuira annunzià en ina communicaziun a las medias.
A mai plascha questa lavur ed il contact cun la populaziun.
Maissen maina gia il Departament da construcziun da Cuira sco commembra dal Cussegl da la citad. Sut Maissen haja dà pliras midadas positivas a Cuira. La construcziun da l'areal da scola e sport Fortuna, e la renovaziun da la staziun Cuira vest. En la proxima legislatura vul ella vinavant bajegiar or la segirtad a Cuira, er en connex cun la criminalitad da drogas.
Plinavant duain las finanzas da la citad vegnir consolidadas, i duai dar mesiras cunter la mancanza da persunal e la protecziun dal clima duai vegnir resguardada en la planisaziun locala.
Maissen vul daventar l'emprima presidenta da la citad Cuira, tenor la communicaziun. Ella surpigliass il post dad Urs Marti , ch'ha cuntanschì suenter trais legislaturas la limitaziun dal temp d'uffizi. Sper Maissen candidescha Patrik Degiacomi (PS) e Hans Martin Meuli (PLD) per il presidi da la citad. Per il Cussegl da la citad candidescha era Hanspeter Hunger da la PPS.