La Partida socialdemocratica da la citad da Cuira ha nominà uffizialmain Patrik Degiacomi sco candidat per il presidi da la citad da Cuira. Sco la partida scriva saja Degiacomi vegnì confermà ier a chaschun da la radunanza da nominaziun.
El aveva annunzià ils 10 da matg da vulair candidar ed è uschia l'emprim candidat che sa metta a disposiziun per il post dad Urs Marti ch'ha cuntanschì suenter trais legislaturas la limitaziun dal temp d'uffizi.
A la conferenza da medias ha Degiacomi accentuà ch'el haja dapi sia entrada en uffizi sco manader dal departament furmaziun, societad e cultura tranter auter pudì sbassar ils pretschs per las canortas d'uffants u chattar ina schliaziun per l'educaziun musicala ordaifer la scola.
Sias finamiras vesia el tar la scena da drogas, la sanaziun dal teater Cuira e la purschida d'abitaziuns pajablas.