Ils hotels en il Grischun han registrà l'onn passà pli che 5,5 milliuns pernottaziuns. En cumparegliaziun cun il 2023 saja quai in augment da var 2%, communitgescha Grischun Vacanzas sin basa da las cifras da l'Uffizi federal da statistica. Var dus terzs dals giasts sajan oriunds da la Svizra.
Las pli bleras pernottaziuns en il Grischun han gì las regiuns Engiadina San Murezzan, Tavau/Claustra e Scuol Samignun Val Müstair.
Onn da record per la hotellaria svizra
Uschè blers giasts sco il 2024 han ils hotels en Svizra anc mai dumbrà. L'hotellaria svizra ha cuntanschì l'onn 2024 cun 42,8 milliuns pernottaziuns in nov record. Cumpareglià cun l'onn 2023 è il dumber da pernottaziuns s'augmentà per 2.6%. La dumonda dals giasts da l'exteriur è s'augmentada per 5.1% sin 22 milliuns pernottaziuns ed è uschia raivida sin il nivel il pli aut dapi 50 onns. Quai resulta dals resultats definitivs da l'Uffizi federal da statistica. La dumonda da giasts da la Svizra è restada cun 20.9 milliuns pernottaziuns tuttina auta sco l'onn precedent.
