Ch'i vegn discurrì adina pli savens englais sin las pistas da Sedrun-Andermatt è quai che croda en egl il pli emprim. Surtut ad Andermatt vegnan adina dapli persunas dals Stadis Unids per far vacanzas da skis. Ina da las raschuns è ch'ir cun skis en Svizra è pli bunmartgà ch’en lur pajais origin, din Nicole Kaucher e ses um Kurt Kaucher che vegnan da Pennsyilvania. Els giaudian las pistas ed era la culinarica en Svizra. Qua saja tut pli paschaivel e patgific chen ils Stadis Unids. Uschia vegnian els era a returnar puspè, di il pèrin.
Per nus èsi stà pli bunmartgà da sgular da Philadelphia a Turitg che dad ir a Colorado, Idao u Montana.
Uschia ha il pèr Kaucher pachetà las coffras ed è partì per far vacanzas da skis en il territori da Sedrun-Andermatt ch'è dapi trais onns en mauns americans. Il 2022 aveva l'interpresa «Vail Resorts» cumprà il territori.
Sch'ins va tar nus a Vermont, New Hampshire ni Maine cun skis ha quai bleras plontas da las varts – qua èsi tut avert nua ch'ins guarda.
Il dollar ferm fa pussibel bler
Per Reiger Groenveld, ch’è naschì en la California e viva dapi blers onns ad Amsterdam datti plirs motivs daco ch’ils Americans e las Americanas vegnan a far vacanzas en Svizra. Per l’ina saja il dollar ferm il mument e perquai las vacanzas en l’exteriur pli favuraivlas, per l'autra sajan er las pistas e l’infrastructura en Svizra idealas e la finala era la cuntrada ch’attiria ils osps americans. Per el sez, che vegn gia 30 onns en Svizra a far vacanzas perquai che sia dunna è dad Andermatt, sajan las muntognas en Svizra simplamain motiv avunda da vegnir adina puspè en la regiun dad Andermatt e Sedrun a far vacanzas la stad sco l’enviern.
L'atmosfera è autra, la glieud è pli amicabla e prenda pli serius l'ir cun skis. Per els èsi dapli che be vacanzas, i para d'esser ina moda e maniera da viver qua en Svizra.
Bunas perspectivas per il futur
Silvio Schmid, anteriur directur da las pendicularas da Sedrun-Andermatt vesa grond potenzial en ils giasts ord ils Stadis Unids. Surtut sche «Vail Resort» cumpra anc dapli territoris da skis en l’Europa saja l'epic-pass in grond potenzial da giasts.
Bleras persunas recumondan da vegnir ad Andermatt. Nus avain passentà qua in fitg bun temp.
L’epic pass è l’abunament da l’inerpresa americana che pussibilitescha d’ir cun skis en 42 territoris da skis, surtut en ils Stadis Unids, ma era en Svizra ad Andermatt ed a Crans-Montana. Quai pass da skis pudess purtar en l’avegnir blers osps da sur la mar ad Andermatt e Sedrun.
